लक इन पिरियड खुल्ने बित्तिकै सुटुक्क सेयर बेच्न नमिल्ने, ३० दिन अघि नै जानकारी दिनुपर्ने

नेपाल धितोपत्र बोर्डले सूचिकृत कम्पनीहरुको लक इन पिरियड खुल्नु ३० दिन अघि नै सार्वजनिक सूचना प्रकाशित गरि सबैलाई जानकारी दिनुपर्ने व्यवस्था गरेको छ ।

धितोपत्र बोर्ड सञ्चालक समिति बैठकले ‘लकइन’मा रहेको सेयर दोस्रो बजारमा कारोबार खुल्नुभन्दा ३० दिनअघि नै लगानीकर्ता र सरोकारवालाई सूचना जारी गरेर जानकारी गराउनुपर्ने निर्णय गरेको हो । सार्वजनिक रुपमा जारी भएको सूचना धितोपत्र बोर्ड, नेप्से र सीडीएसलाई पनि उपलब्ध गराउनु पर्ने निर्देशनमा उल्लेख छ।

सूचिकृत संगठित संस्थाहरुले लक इन पिरियड खुल्नु अघि ३० दिन कुन समुहको सेयर हो ?  कसले कति कित्ता सेयर बेच्ने हो ? सोको सम्पूर्ण विवरण नेप्से र सीडीएससीको वेभसाइटमा एक हप्तासम्म राख्नुपर्ने नियम लागु गरेको हो । यो नियम मंसिर २५ गतेदेखि नै लागु हुने बोर्डले जनाएको छ।

लकइनमा रहेका सेयरहरु एकाएक खुलेर कारोबार हुँदा सर्वसाधारण लगानीकर्ता फस्ने डर भएको भन्दै विरोध भएको थियो । यो व्यवस्था लागू भएसगै बैंक तथा वित्तिय संस्था र इन्स्योरेन्स बाहेकका कम्पनीका लगानीकर्ताहरुले लक इन पिरियड खुल्ने वित्तिकै सुटुक्क सेयर बेचेर भाग्न पाउने छैनन् ।

बिशेषगरि हाइड्रोपावर कम्पनी, सिमेन्ट लगायतका फ्रन्ट लाइन रेगुलेटर नभएका कम्पनीहरुले लक इन खुल्ने वित्तिकै सेयर बेचेर मुल लगानीकर्ताहरु निस्किने र बजार तल घटेका बेला फेरि बजारमा प्रवेश गरेर पुनः चलखेल गरिरहेको आरोप लागिरहेको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।