सिजी ग्रुपको सिजी सिमेन्ट इन्डष्ट्रिज साढे १२ अर्ब ऋण भुक्तानी गर्न असक्षम

व्यापारिक घराना सिजी ग्रुपको लगानी रहेको सिजी सिमेन्ट इन्डष्ट्रिज पाल्पा प्रालिले १२ अर्ब ५४ करोड ७० लाख ऋण भुक्तानी गर्न सकेको छैन ।

सन् २०२२ को जुलाई महिनामा रेटिङ एजेन्सी इक्रा नेपालले सिजी सिमेन्ट इन्डष्ट्रिज पाल्पालाई ९ अर्ब ५४ करोड ७० लाख बराबरको दीर्घकालीन कर्जाका लागि बी प्लस र ३ अर्ब बराबरको अल्पकालीन कर्जाका लागि ए४ रेटिङ गरेको थियो । बैंकले सो ऋण भुक्तानी गर्न तोकेको ३० दिन नाघिसक्दा समेत कम्पनीले कुनै प्रतिक्रिया नदिएको इक्रा नेपालले जारी गरेको विज्ञप्तिमा उल्लेख छ ।

इक्रा नेपालका अनुसार एजेन्सीले कर्जा समीक्षाको विषयलाई लिएर पटक पटक सम्पर्क गर्न खोज्दा समेत कम्पनी सम्पर्कमा नआएको हो । जसकारण इक्रा नेपालले सिजी सिमेन्ट इन्डष्ट्रिज पाल्पा प्रालिको रेटिङ घटुवा गरी दीर्घकालीन तथा अल्पकालीन कर्जाका लागि ‘डि’ रेटिङ गरेको छ । जसको अर्थ कम्पनीले वित्तीय दायित्व पूरा गर्न असक्षम रही ‘डिफल्ट’ को अवस्थामा पुगेको भन्ने हो ।

रेटिङ एजेन्सी इक्रा नेपालको डिफल्ट रिकगनीसन नीति अन्तर्गत कम्पनीको रेटिङ घटाएको विज्ञप्तिमा उल्लेख छ ।

सन् २०११ मा स्थापना भएको सिजी सिमेन्टको उत्पादन प्लान्ट पाल्पाको रैनादेबी छहरा गाउँपालिकाको सरदेवामा अवस्थित छ ।

कम्पनीले क्लिकंर तथा सिमेन्ट उत्पादन गरिरहेको छ। कम्पनीको क्लिंकर उत्पादन क्षमता २ हजार ९५० टन प्रतिदिन रहेको छ भने सिमेन्ट उत्पादन क्षमता २ हजार ८०० टन प्रतिदिन रहेको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।