नाफा सुधारेको कर्णाली डेभलपमेन्ट बैंकको खराब कर्जा साढे चार प्रतिशत नजिक

कर्णाली डेभलपमेन्ट बैंकले खराब कर्जा व्यवस्थापनबाट रकम फिर्ता हुँदा खुद नाफामा उत्साहजनक रुपमा बढोत्तरी गरेपनि अझैपनि बैंकको खराब कर्जा अनुपात भने साढे चार प्रतिशत नजिक देखिएको छ ।

आज सार्वजनिक चालु आर्थिक वर्षको दोस्रो त्रैमाससम्मको अपरिष्कृत वित्तीय विवरण अनुसार यस विकास बैंकले ४ करोड ७८ लाख रुपैयाँ खुद मुनाफा आर्जन गरेको छ । गत आवको सोही अवधिमा १ करोड ३७ लाख रुपैयाँ रहेको नाफा १९२.१५ प्रतिशतले बढेको हो । यस्तै बैंकको वितरणयोग्य नाफा ३४ करोड १७ लाख १२ हजार ऋणात्मक छ ।

बैंकको खराब कर्जा अनुपात ४.४७ प्रतिशत पुगेको छ । अघिल्लो आवमा ३.१७ प्रतिशत रहेको बैंकको खराब कर्जा अनुपात १.३० प्रतिशत बिन्दुले बढेको हो ।

चालु आर्थिक वर्ष २०८०–८१ को दोस्रो त्रैमासिक अपरिष्कृत वित्तीय विवरण अनुसार बैंकको खुद ब्याज आम्दानीमा २१.११ प्रतिशत गिरावट आएको छ । अघिल्लो आवको दोस्रो त्रैमासमा ७ करोड ७५ लाख ४६ हजार खुद ब्याज आम्दानी गरेको बैंकले हाल ६ करोड ११ लाख ७३ हजार मात्र खुद ब्याज आम्दानी गरेको हो । बैंकको सञ्चालन मुनाफा १९२.१५ प्रतिशतले बढेर ४ करोड ७८ लाख ३० हजार रुपैयाँ पुगेको छ ।

बैंकले खराब कर्जा वापत व्यवस्था गरेको ३ करोड ६४ लाख २० हजार रुपैयाँ इम्प्येरमेन्ट चार्ज फिर्ता भएपछि बैंकको खुद ब्याज आम्दानी घटेपनि नाफामा सुधार आएको हो । अघिल्लो आवको सोही अवधिमा १ करोड १ लाख कर्जा जोखिम ब्यवस्था गरेको थियो । बैंकको जगेडा कोषमा ३९ करोड २३ लाख ८३ हजार रहेकोमा रिटेर्न अनिङ्ग भने ३४ करोड १७ लाख १२ हजार रुपैयाँ ऋणात्मक छ । सेयर प्रिमियममा साढेचार लाख सञ्चित छ ।

अघिल्लो आवको दोस्रो त्रैमाससम्म ६ रुपैयाँ ५१ पैसा रहेको बैंकको प्रतिसेयर आम्दानी नाफा बढेसँगै १२ रुपैयाँ ५१ पैसा बढेर १९ रुपैयाँ २ पैसा पुगेको छ । बैंकको प्रतिसेयर नेटवर्थ ११०.१७ रुपैयाँ, प्रतिसेयर कुल सम्पत्तिको मूल्य १०५७.८९ रुपैयाँ र मूल्य आम्दानी अनुपात २३.५५ गुणा छ । बैंकको कस्ट अफ फन्ड ९.०१ प्रतिशत छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।