निर्वाचन आयोगद्धारा मतदाता नामावलीमा नाम दर्ता गर्न आह्वान

निर्वाचन आयोगले रिक्त रहेको २३ स्थानमा उपनिर्वाचन मार्फत पदपूर्ति गर्नुपर्ने अवस्था रहेको भन्दै मतदाता नामावलीमा नाम दर्ता गर्न आह्वान गरेको छ ।

विसं २०७९ वैशाख १० गते स्थानीय तह निर्वाचन तथा २०७९ मंसिर ४ गते प्रतिनिधि सभा र प्रदेश सभा सदस्यको निर्वाचन सम्पन्न भएपश्चात् स्थानीय तह, प्रतिनिधि सभा र प्रदेश सभा सदस्यका देहाय बमोजिमका २३ पदहरू रिक्त रहेको आयोगले जनाएको हो । रिक्त पदहरूमा कानून बमोजिम उपनिर्वाचन मार्फत पदपूर्ति गर्नुपर्ने भएकाले आगोगले मतदाता नामावलीमा नाम दर्ता गर्न भनेको हो ।

मतदाता नामावलीमा विभिन्न कारणले नाम दर्ता गर्न छुट भएका देशभरका र विशेषतः पद रिक्त भएका देहायका स्थानीय तह, प्रदेश सभा निर्वाचन क्षेत्र र प्रतिनिधि सभा निर्वाचन क्षेत्रभित्रका योग्यता पुगेका नेपाली नागरिकलाई उपनिर्वाचनको मिति घोषणा हुनुपूर्व नै मतदाता नामावलीमा नाम दर्ता गर्न आयोगले आह्वान गरेको छ ।

रिक्त रहेका २३ स्थानमध्ये कोशीको इलाम २ मा प्रतिनिधि सभा सदस्य, सूदूर पश्चिमको बझाङ १ को १ मा प्रदेश सभा सदस्य, कर्णालीको दैलेख महाबु गाउँपालिमा अध्यक्ष, कर्णालीको जाजरकोटमा रहेको नलगाड नगरपालिमा उपप्रमुख, दोलखाको गौरीशंकर गाउँपालिमा उपाध्यक्ष, बाजुराको स्वामीकार्तिक खापर गाउँपालिमा उपाध्यक्ष पद रिक्त भएको हो । यस्तै देशका विभिन्न १७ स्थानका वडा अध्यक्ष पद पनि रिक्त रहेको आयोगले जनाएको छ ।

कहाँ कहाँ हुन्छ उपनिर्वाचन ?

आयोगका सहसचिव एवम् प्रवक्ता शालिग्राम शर्मा पौडेलले मतदाता नामावलीमा आफ्नो नाम दर्ता तथा अद्यावधिक गर्ने कार्यमा सरिक भई आफ्नो मताधिकार सुरक्षित गर्न सबैमा आग्रह गरे । उनका अनुसार उपनिर्वाचनद्वारा पदपूर्ति गर्न आयोगले नेपाल सरकारसँग परामर्श गरी उपयुक्त समयमा कानून बमोजिम उपनिर्वाचनको मिति तोक्ने गरी आन्तरिक तयारी प्रारम्भ गरेको छ । मतदाता नामावली ऐन, २०७३ को दफा ४ (२) बमोजिम निर्वाचनको मिति तोकिएपछि सोही मितिदेखि उक्त निर्वाचन प्रयोजनका लागि मतदाता नामावलीमा नाम दर्ता गर्ने कार्य स्थगित गर्नुपर्ने कानूनी व्यवस्था रहेको छ । आयोगले नियमितरुपमा प्रदेश तथा जिल्ला निर्वाचन कार्यालयहरू मार्फत मतदाता नामावली दर्ता गर्ने कार्य गर्दै आएको उनले बताए । नागरिकको सहजताको लागि बाह्य जिल्लाबाट मतदाता नामावली दर्ता गर्न सकिने सुविधा समेत उपलब्ध गराएको उनको भनाई छ ।

मतदाता दर्ता सम्बन्धी विद्यमान व्यवस्था बमोजिम देशभरका योग्यता पुगेका सबै नेपाली नागरिकहरूको मतदाता नामावलीमा नाम दर्ता भएकोमा आयोगले विश्वास व्यक्त गरेको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।