लगानीकर्ताको मनोबल बलियो बन्न नसक्दा आइतबार पनि सेयर बजारमा गिरावट जारी

सेयर बजारका लगानीकर्तााको मनोबल कमजोर बन्दा साताको पहिलो कारोबार दिन आइतबार पनि सेयर बजार सूचक मापक नेप्से परिसूचक घटेर बन्द भएको छ ।

बिहीबार १४.४६ अंकले ओरालो लागेको सेयर बजारमा आइतबार थप गहिरिँदै २७.२१ अंकले घटेको हो । नेप्से परिसूचक १.३१ प्रतिशत घटेर २०३४.८२ बिन्दुमा झरेको छ । यस दिन सेन्सेटिभ इण्डेक्स ३.३५ अंक, फ्लोट इण्डेक्स १.८६ अंक, सेन्सेटिभ इण्डेक्स १.०२ अंक घटेको छ । कारोबारमा आएका १३ उपसमूहगत सूचकमध्ये सबै राताम्ये बनेका छन् । यस दिन फाइनान्स सर्वाधिक २.७० प्रतिशत घटेको छ भने जलविद्युतको इन्डेक्स पनि २.१५ प्रतिशतले ओरालो लागेको छ । बैंकिङ्ग र उत्पादन तथा प्रशोधन मुलक इन्डेक्स एक प्रतिशतभन्दा कम घट्दा बाँकी ९ ओटाको १ प्रतिशतभन्दा धेरैले घटेको छ ।

यसदिन ३१५ कम्पनीको १ करोड ७ लाख ७२ हजार ४८३ कित्ता सेयर ९७ हजार १०५ ओटा संख्याबाट ३ अर्ब ७७ करोड ५४ लाख २२ हजार १९६ रुपैयाँमा खरिद बिक्री भएको छ । अघिल्लो दिन बिहीबार ३०५ कम्पनीको १ करोड १४ लाख कित्ता सेयर ३ अर्ब ८६ करोड ९१ लाखमा कारोबार भएको थियो । बजार ओरालो लागेसँगै आज दैनिक कारोबार रकम ९ करोड ३७ लाख रुपैयाँले घटेको हो । आज कारोबारमा आएका ३१५ कम्पनी मध्ये ५१ ओटाको सेयर मूल्य बढेको छ भने २५२ ओटाको मूल्य घटेको छ । १२ कम्पनीको मूल्य स्थीर रहेको छ ।

चुक्ता पुँजीको ४ प्रतिशत बोनस सेयर सुरक्षित गर्ने अन्तिम दिन रहेको हिमालयन रि इन्स्योरेन्स आज कारोबार रकमका आधारमा शीर्ष स्थानमा रहेको छ । सर्वाधिक कारोबार भएको यस कम्पनीको ४० करोड ९० लाख रुपैयाँको ६ लाख ३२ हजार ७५७ कित्ता सेयर खरिद बिक्री भएको छ । यस्तै एनआईसी एशिया बैंकको १३ करोड ६५ लाख, जोशी हाइड्रोपावर १० करोड ६४ लाख, सगरमाथा जलविद्युतको ९ करोड २७ लाख, युनियन हाइड्रोपावरको ७ करोड ६१ लाख बढीको कारोबार भएको छ ।

आइतबारको बजारमा पनि बोटलर्स नेपाल (बालाजु) लिमिटेड र समाज लघुवित्तको सेयर मूल्य १० प्रतिशत बढेर सकारात्मक सर्किट लागेको छ । यससँगै बोटलर्स नेपालको सेयर मूल्य प्रतिकित्ता १० हजार २४२ रुपैयाँ ९० पैसा र समाज लघुवित्तको १६३५ रुपैयाँ २० पैसा पुगेको छ । त्यस्तै किसान लघुवित्त ८.२२ प्रतिशत, युनियन हाइड्रोपावरको ६.६५ प्रतिशत र आशा लघुवित्तको सेयर मूल्य ६.०४ प्रतिशतले बढेको छ ।

आज सबैभन्दा धेरै सालिङ्ग पावर कम्पनीका लगानीकर्ताले गुमाएका हुन् । यस कम्पनीका लगानीकर्ताले आज ८.२१ प्रतिशतका दरले गुमाएका हुन् । यससँगै कम्पनीको मूल्य ५८.३० रुपैयाँले घटेर ६५१.७० रुपैयाँमा झरेको छ । यस्तै दोर्दीखोला जलविद्युतको ६.१५ प्रतिशत, पाँचथर पावरको ५.९१ प्रतिशत, बाराही हाइड्रोपावरको सेयर मूल्य ५.८२ प्रतिशत, एनआईसी एशिया ग्रोथ फन्डको इकाई मूल्य ५.६१प्रतिशतले घटेको छ ।

आइतबारको गिरावटपछि कुल बजार पुँजीकरण घटेर ३१ खर्ब ९८ अर्ब ५६ करोड ९८ लाख ९ हजार ७०१ रुपैयाँमा समेटिएको छ । बिहीबार ३२ खर्ब ४१ अर्ब ३४ करोड ५० लाख थियो । आइतबार मात्रै ४२ अर्ब ७७ करोड ५२ लाख रुपैयाँले बजार पुँजीकरण घटेको हो ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।