ढुंगाखानीमा एक अर्ब भ्रष्टाचार, गोदावरीका मेयरसहित १४ जनाविरुद्ध मुद्धा

अख्तियार दुरूपयोग अनुसन्धान आयोगले ललितपुरको गोदावरी नगरपालिकाका मेयर गजेन्द्र महर्जनसहित १४ जनाविरुद्ध भ्रष्टाचार मुद्दा दायर गरेको छ।

आयोगले सोमबार मेयर महर्जनसहित १४ जनाविरुद्ध १ अर्ब बिगो माग गर्दै विशेष अदालत काठमाडौंमा आरोप-पत्र दायर गरेको हो। अख्तियारले एकै कसुरमा ५ वटा मुद्दा दायर गरेको छ । उनीहरूमाथि ढुंगाखानीमा अनियमितता गरेको आरोप छ ।

गोदावरीका लेले र नल्लुका ढुंगाखानीबाट रोडाढुंगा उत्खनन गर्दा मेयर महर्जनसहित भ्रष्टाचार गरेको अख्तियारको आरोप छ । मुद्दा पर्नेमा मेयर महर्जन, ४ कर्मचारी र ९ जना क्रसर सञ्चालक छन् ।

आयोगले मेयर महर्जनसहित उपमेयर मुना अधिकारी, तत्कालीन प्रमुख प्रशासकीय अधिकृतहरु बिश्वराज मरासिनी, कृष्णप्रसाद जैसी,प्रविन कोइराला र वीरेन्द्रदेव भारतीलाई समेत प्रतिवादी बनाएको छ । यस्तै राजस्व समितिका सदस्य सचिव यमलाल बेलवासे, राजस्व शाखा प्रमुखहरु श्रीराम आचार्य र श्रीकण्ठ घिमिरे, माली निर्माण सेवाका प्रकाश माली, कर्मा कन्स्ट्रक्सनका रवि महर्जन, सप्तपथ कन्स्ट्रक्सनका मदन केसीलगायत १४ जनालाई प्रतिवादी कायम गरेर सोमबार विशेष अदालतमा मुद्दा दर्ता भएको हो ।

आयोगले २०७५ देखि २०८० सम्म पाँच आर्थिक वर्षमा खनिजजन्य पदार्थ निकासी करमा भ्रष्टाचार गरेको आरोप लगाएको छ । मेयर महर्जनसहित आरोपीहरुले प्रदेश सरकारले तोकेको निकासी कर नौ रुपैयाँ लिनुपर्नेमा दुई रुपैयाँ ७५ पैसामात्र लिएर प्रदेश तथा स्थानीय सरकारलाई घाटा र व्यक्तिगत फाइदा लिएको अभियोगपत्रमा दाबी गरेको छ । उनीहरुले सरकारी दररेट कम गरेर १ अर्ब ४ करोड ८७ लाख भ्रष्टाचार गरेको अख्तियारको आरोप छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।