राष्ट्रिय सहकारी बैंक २२औं वर्षमा, मर्यादित र व्यवसायिक सेवा दिने प्रतिबद्धता

राष्ट्रिय सहकारी बैंक लिमिटेड २२ औं वर्षमा प्रवेश गरेको छ । विसं २०६० असार २५ गते सहकारी विभागमा दर्ता भई २०६१ साउन १९ गतेबाट कारोबार शुभारम्भ गरेको बैंकले साउन १९ लाई स्थापना तथा कारोबार शुभारम्भ दिवसका रुपमा मनाउदै आएको छ । २०६७ साउन १० गते नेपाल राष्ट्र बैंकबाट सिमित बैंकिङ कारोबारको अनुमति पाएको बैंकले देशभरका सहकारी संघ संस्थाहरुसँग कारोबार गर्दै आइरहेको छ ।

२१ वर्षे यात्रामा सहकारी क्षेत्रलाई नै आफ्नो प्रमुख कार्यक्षेत्र बनाएको बैंकले आर्थिक वर्ष २०८०/०८१ को असार मसान्तसम्म ६९ अर्ब ५५ करोड कुल सम्पत्ति पुर्‍याउन सफल भएको छ । ७७ वटै जिल्लामा सदस्यता विस्तार गर्दै १६ हजार ३ सय २८ सहकारी संघ संस्थाहरुमार्फत करीब ३५ लाख व्यक्तिहरु आवद्ध भइसकेको र बाँकी सहकारी संस्थाहरुले पनि सदस्यता लिने क्रम जारी रहि रहेको बैंकले जनाएको छ । बैंकले देशभर ६८ वटा शाखाहरु मार्फत सहकारी संघ संस्थाहरुलाई उत्कृष्ट वित्तीय तथा गैर–वित्तीय सेवा प्रदान गरिरहेको छ ।

बैंकको आन्तरिक सबलीकरण तथा सुशासन कायम गर्दै नवीनतम प्रविधिको प्रयोग, अन्तर्राष्ट्रिय सञ्जालीकरणमा प्रभावकारी उपस्थिती, गुणस्तरीय सेवामार्फत सहकारी संघसंस्थाको दीगो विकासमा टेवा पुर्‍याउँदै सहकारीहरूको आन्तरिक सबलीकरण र व्यावसायिक सफलताका लागि बैंकले वित्तीय तथा गैर–वित्तीय सेवाहरु प्रदान गरिरहेको छ ।

सदस्य सहकारी संघ/संस्थाहरुलाई वित्तीय सेवाका अतिरिक्त संस्थागत सुशासन एवम् वित्तीय अनुशासनका लागि सहकारी स्तरीकरण, तालिम तथा शिक्षा, डिजिटलाइजेसन, सहकारी अभियानको संरक्षण र सम्वर्धनका लागि पहलकदमी जस्ता विविध गतिविधिहरु सञ्चालन गर्दै आइरहेको बैंकले जनाएको छ ।

सदस्यहरुबीच लोकप्रिय रहेको सदस्य शिक्षा कार्यक्रम अन्तर्गत इ–पुस्तकालय, समसामयिक विषयमा हरेक हप्ता परामर्श सेवा र सहयोग, जानकारीमुलक कार्यक्रम तथा सदस्य सम्मान कार्यक्रमको आयोजनाका कारणले पनि सदस्यहरुमा हौसला तथा उत्प्रेरणा जगाउने कार्यमा मद्दत पुग्नुको साथै बैंक प्रतिको सम्बन्ध अझ प्रगाढ बन्दै गएको बैंकले जनाएको छ । बैंकले आफ्नो कार्य सञ्चालन गर्ने दौरानमा नियामकीय प्रावधानहरुको प्रारुपलाई पालना गर्दै वित्तीय जवाफदेहीता, पारदर्शिता, निष्पक्षता, बचतकर्ताको निक्षेप सुरक्षण तथा सुरक्षित कर्जा लगानी र अन्तरर्निहित जोखिम व्यवस्थापनलाई प्राथमिकतामा राखी कार्यसम्पादन गर्दै आएकोले पनि बैंकले सदस्यमैत्री सेवा प्रदान गर्न सक्षम उल्लेख गरेको छ ।

बैंकका प्रमुख कार्यकारी अधिकृत बद्री कुमार गुरागाईंले बैंकले “उत्कृष्ट वित्तीय सेवा सहितको सहकारी बैंक” परिकल्पना गरी १० वर्षे रणनीतिक योजना तय गरी बैंक अघि बढिरहेको बताए । विद्यमान प्रतिकुल समयमा पनि बैंकले आफ्नो कार्य सञ्चालन गर्ने दौरानमा नियामकीय प्रावधानहरुको प्रारुपलाई पालना गर्दै आएकोले पनि सदस्यमैत्री सेवा प्रदान गर्न सक्षम रहेको उल्लेख गर्दै बैंकले तत्कालको लागि हुने लाभहानी भन्दा पनि दिगो र मर्यादित सेवा उपलब्ध गराउन उद्दत रहेको उनले बताए ।

बैंकले आफ्नो २२ औं स्थापना दिवसको अवसरमा सातवटै प्रदेशमा एकै दिनमा “सहकारीको बर्तमान अवस्था र भावी कार्यदिशा बिषयक प्रदेशस्तरीय गोष्ठी एवं सदस्य सम्मान कार्यक्रम” को आयोजना गरेको छ । कार्यक्रममा गत पुसमा सम्पन्न बैंकको २० औं वार्षिक साधारण सभामा घोषणा भएको व्यक्ति तथा संघ/संस्थाहरुको विभिन्न विधाको पुरस्कार वितरण गर्ने कार्यक्रम रहेको बैंकले जनाएको छ ।

संस्थाको चुक्ता पुँजी २ अर्ब ७८ करोड ९२ लाख ६० हजार रुपैयाँ, जगेडा कोषमा १ अर्ब ४७ करोड ३१ लाख ४२ हजार रुपैयाँ, कुन बचत (निक्षेप) ६१ अर्ब ७ करोड ७९ लाख, कुल ऋण लगानी २६ अर्ब २७ करोड ६३ लाख र कुल सम्पत्ति ६९ अर्ब ५५ करोड ९ लाख रुपैयाँ रहेको छ । सदस्य संख्या १६ हजार ३२८ रहेको राष्ट्रिय सहकारी बैंकमा १ हजार ५१८ ऋणी रहेका छन् । ३० अर्ब २७ करोड ३० लाख रुपैयाँ तरलता रहेको बैंकमा ४९.५६ प्रतिशत बराबरको तरलता छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।