९९ करोडले पूँजी बढाउनुपर्ने दबावमा रहेको एनसीसी बैंकको वितरण योग्य नाफा ८४ करोड

नेपाल क्रेडिट एण्ड कर्मस बैंक (एनसीसी) ले चालू आर्थिक वर्षको तेस्रो त्रैमासिक अवधिमा गत वर्ष यसै अवधिको तुलनामा धेरै सूचाङ्कमा सुधार गरेको विवरण सार्वजनिक गरेको छ ।

बैंकले खुद नाफा, ब्याज आम्दानी, संचालन नाफा, कर्जा, निक्षेप लगायतका सूचकहरू सबल बनाएपनि बैंकको प्रतिशेयर आम्दानी र नेटवर्थ भने कमजोर बनेको छ ।

पचास प्रतिशत हकप्रद बिक्री गर्दा समेत राष्ट्र बैंकले तोकेको न्यूनतम आठ अर्ब चुक्ता पूँजी पुर्याउन नसकेको बैंकको पतिशेयर आम्दानी खस्केको छ ।

समीक्षा अवधिमा बैंकले निक्षेप सात प्रतिशतले वृद्धि गरेको छ भने कर्जा लगानी करिब ११ प्रतिशतले बढाएको छ । बैंकको कोषको लागत तथा आधार ब्याजदर दुवै घटेको छ ।

बैंकले ९ महिनाको अवधिमा एक अर्ब १६ करोड खुद नाफा गरेको छ । जुन गतबर्षको यसै अवधिका तुलनामा ३१ प्रतिशत भन्दा धेरै हो । बैंकको वितरण योग्य नाफा ८४ करोड छ ।

हकप्रद बेचेर ५० प्रतिशत चुक्ता पूँजी वृद्धि गरेको बैंकको नाफा ३१ प्रतिशत मात्र वृद्धि भएकोले बैंकको प्रतिशेयर आम्दानी घटेको छ । बैंकको प्रतिशेयर आम्दानी २२ रुपैयाँ ११ पैसा छ । गत वर्षको यसै अवधिमा २५ रुपैयाँ ३० पैसा थियो । यस्तै प्रतिशेयर नेटवर्थ १७५ रुपैयाँ छ ।

हाल बैंकको चुक्ता पूँजी ७ अर्ब एक करोड ८५ लाख रुपैयाँ छ । राष्ट्र बैंकले तोकेको न्यूनतम ८ अर्ब रुपैयाँ चुक्ता पुँजी पुर्याउन बैंकलाई अझै ९९ करोड अपुग देखिन्छ । बैंकको जगेडा कोषमा ५ अर्ब २४ करोेड छ।

बैंकले यसअवधिसम्म ६१ अर्ब ४५ करोड रुपैयाँ निक्षेप संकलन गरी ५६ अर्ब ८० करोड कर्जा लगानी गरेको छ। बैंकको कर्जा निक्षेप अनुपात सिसिडि रेशियो ७६.६१ प्रतिशत छ । बैंकको खराब कर्जा अनुपात ३.२६ प्रतिशत, आधार ब्याजदर १०.८६ प्रतिशत र कोषको लागत ७.९४ प्रतिशत रहेको छ ।