१५९ अंकको सुधारपछि नेप्सेमा दुई अंकको करेक्सन, ३४० करोडको कारोबार

नेपाल स्टक एक्सचेन्ज (नेप्से) मा सात कारोबार दिनपछि सामान्य करेक्सन आएको छ। लगतार बढेको बजार १५९ अंकले बढेर १५०४ अंकसम्म पार गरेको थियो । सातौ दिनमा आएर करिब दुई अंकको करेक्सन भएको छ ।

सोमबार नेप्से सूचक १.९६ अंकले घटेर १५०२.१८ बिन्दुमा झरेको छ । बजारमा सामान्य करेक्सन आएपनि कारोबार रकम भने उत्साहप्रद नै रहेको छ ।

यसदिन १७९ कम्पनीको ८३ लाख ४८ हजार २३४ कित्ता शेयर ३ अर्ब ४१ करोड ५ लाख बढीको शेयर किनबेच भयो । कारोबार रकम अघिल्लो दिनको तुलनामा १९ करोड कम हो ।

सोमबार शेयर बजारमा भएको हालसम्मकै दोस्रो उच्च कारोबार हो । आइतबार ३ अर्ब ६० करोड बराबरको शेयर किनबेच भएको थियो ।

शेयर बजारले सुधारको गति समातेपछि नयाँ लगानीकर्ता प्रवेश गर्नुका साथै पुराना र संस्थागत लगानीकर्ताले समेत लगानी बढाउन थालेपछि पछिल्ला दिनहरुमा कारोबार उच्च हुँदै आएको छ ।

गत साता ५ कारोबार दिनमा ११ अर्ब बढीको शेयर किनबेच भएको थियो । यो साताको पहिलो दुई दिनमै ७ अर्ब बढीको शेयर किनबेच भईसकेको छ । कारोबारमा आएको उत्साहले शेयर लगानीकर्ताको मनोबल बढ्दै गएको छ भने ब्रोकर कम्पनीहरु लगानीकर्ताले भरीभराऊ हुन थालेका छन् ।

पछिल्लो चरणमा अनलाइन मार्फत शेयर किनबेच गर्ने लगानीकर्ताहरुको संख्या बढ्न थालेपछि कारोबार रकममा बढोत्तरी आउन थालेको छ । नेप्सेका अनुसार स्वेदेशबाट मात्र नभई विदेशबाट समेत शेयर लगानीकर्ताले अनलाइन कारोबार गर्न थालेका छन् । आइतबार ४१ करोड बराबरको शेयर विदेशबाट किनबेच भएको थियो ।

सोमबारको बजारमा वाणिज्य बैंक,उत्पादन र अन्य बाहेक सबै समूह नकारात्मक रहेपनि वाणिज्य बैंक समूहमा आएको उच्च सुधारले बजारमा ठूलो करेक्सन भएन । एनएमबि बैंकको सबैभन्दा धेरै २० करोड बढीको शेयर किनबेच भयो ।

यसदिन कालिका माइक्रो, मन्जुश्री फाइनान्स, युनियन हाइड्रो लगायतको शेयर उच्चदरले बढेको छ भने सबैभन्दा धेरै गुह्श्वरी मर्चेन्ट र प्रिमियर इन्स्योरेन्सको शेयरमूल्य ७ प्रतिशत बढीले ओरालो लाग्यो ।