विश्वभर कोरोना संक्रमणबाट करिब ६८ हजारको मृत्यु, १२ लाख ४५ हजार संक्रमित

विश्वभरि महामारीका रुपमा फैलिएको कोरोनाभाइरसको सङ्क्रमणबाट आइतबार बेलुका १० बजेसम्म विश्वका विभिन्न देशमा गरी ६७ हजार ९०१ जनाको मृत्यु भएको छ ।

विश्व स्वास्थ्य सङ्गठन र जोन्स हप्किन्स विश्वविद्यालयले सार्वजनिक गरेकोे पछिल्लो विवरणअनुसार संंंसारभरि १२ लाख ४४ हजार ९६९ व्यक्ति कोरोना भाइरसबाट सङ्क्रमित भएका छन् ।

सङ्क्रमित व्यक्तिहरुमा २ लाख ५६ हजार ४९६ जना उपचारपछि घर फर्किएका छन् भने ९ लाख २० हजार व्यक्ति हाल उपचारारत छन् ।

चीनको हुबेइ प्रान्तको उहान शहरबाट शुरु भएको कोभिड–१९ लाई विश्व स्वास्थ्य सङ्गठनले ‘विश्वव्यापी महामारी’को सङ्ज्ञा दिएको छ । सोही बमोजिम नागरिकलाई सतर्कता अपनाउन पनि विश्व स्वास्थ्य संगठनले विश्वका सबै देशका नागरिकलाई आग्रह गरिरहेको छ । यद्यपी पछिल्लो चरणमा संयुक्तराज्य अमेरिका सहित युरोपेली मुलुकहरुमा यस भाइरसका कारण भयावह स्थिति उत्पन्न भएको छ ।

हाल कोरोनाभाइरसका कारण अत्यन्त प्रभावित इटालीमा आज ५२५ जना सहित १५ हजार ८८७ जनाको मृत्यु भइसकेको भने १ लाख २९ हजार सङक्रमित छन् । स्पेनमा आज ४७१ जना सहित १२ हजार ४१८ जनाको मृत्यु भएको छ भने १ लाख ३० हजार भन्दा बढी सङक्रमित रहेका छन् ।

कोरोनाभाइरसको अर्को केन्द्रका रुपमा विकास भइरहेको संयुक्तराज्य अमेरिकामा आइतबार ७१८ जना सहित ९ हजार १७० जनाको मृत्यु भएको छ भने ३ लाख २३ हजार भन्दा बढी सङक्रमित छन् ।

कोरोनाभाइरस सङ्क्रमणबाट चीनमा ३ हजार ३२९ जनाको मृत्यु भएको छ भने कूल संक्रमित ८१ हजार ६६९ जनामध्ये करिब ७७ हजार व्यक्ति निको भएर घर फर्किएका छन् ।

इरानमा कोरोना भाइरसको सङ्क्रमणका कारण ३ हजार ६०३ जनाको मृत्यु भएको छ भने दक्षिण कोरियामा १८३ व्यक्तिको मृत्यु भएको छ ।
कोरोनाभाइरसको सङ्क्रमणको कारण फ्रान्समा ७ हजार ५६० जना, बेलायतमा ४ हजार ९३४ जना, नेदरल्यान्ड्समा १ हजार ७६६ जना, जर्मनीमा १ हजार ५२३ जना, बेल्जियममा १ हजार ४४७ जनाको मृत्यु मृत्यु भइसकेको छ ।

आइतबार मात्रै विश्वमा ४३ हजार बढीमा नयाँ संक्रमण भेटिएको छ जसमा अमेरिकामा सबैभन्दा धेरै १२ हजार बढी पाइएको हो। यस्तै आइतबार थप ३ हजार ३३२ ले ज्यान गुमाएका छन्। जहाँ अमेरिकाबाट ७१९ ले ज्यान गुमाएका छन् भने बेलायत ६२१, इटाली ५२५, स्पेन ४७१, बेल्जियम १६४, इरान १५१, नेदरल्याण्ड ११५ र जर्मनीमा ७९ जनाले मृत्युवरण गरेका हुन्।

हालसम्म अमेरिकामा सबैभन्दा धेरै १६ लाख ८१ हजार बढी परिक्षण् भएको छ। यस्तै जर्मनी ९ लाख १८ हजार, रसिया ६ लाख ९७ हजार, इटाली ६ लाख ९१ हजार, दक्षिण कोरिया ४ लाख ६१ हजार, स्पेन ३ लाख ५५ हजार र क्यानडामा ३ लाख १७ हजार जनामा कोभिड १९ को परिक्षण गरिसकिएको छ।