शोधनान्तर बचत एक महिनामै १६ अर्ब २३ करोडले बढ्यो

चालु आर्थिक वर्षको फागुनममा मुलुकको शोधनान्तर स्थिती ३७ अर्ब ८४ करोड रुपैयाँले बचतमा रहेको छ। यो बचत माघ महिनाको तुलनामा १६ अर्ब २३ करोड रुपैयाँले धेरै हो ।

चालु आर्थिक वर्षको माघ महिनामा मुलुकको शोधनान्तर बचत २१ अर्ब ६१ करोड रुपैयाँ मात्र थियो । यो एक महिनाको अवधिमा देश भित्र भित्रने पैसा बाहिरिने भन्दा धेरै भएपछि शोधनान्तर बचत बढेको हो । पछिल्लो समयमा आयात घटेर निर्यातमा देखिएको सुधारले शोधनान्तर बचत बढ्नमा मद्दत पुगेको हो ।

चालु आर्थिक वर्षको फागुनसम्ममा चालु खाता घाटा १ खर्ब २४ अर्ब ९३ करोड रुपैयाँ रहेको छ । गत आर्थिक वर्षको सोही अवधिमा यस्तो घाटा १ दर्ब ९१ अर्ब ४९ करोड रहेको रुपैयाँ थियो । अमेरिकी डलरमा अघिल्लो वर्षको आठ महिनामा १ अर्ब ६८ करोड रहेको चालु खाता घाटा समीक्षा अवधिमा १ अर्ब १० करोड रहेको छ ।

चालु आवको फागुनसम्ममा पूँजीगत ट्रान्सफर ११ अर्ब १५ करोड र प्रत्यक्ष वैदेशिक लगानी १५ अर्ब ६१ करोड रुपैयाँ रहेको छ । गत आवको सोही अवधिमा पूँजीगत ट्रान्सफर ११ अर्ब ५६ करोड र प्रत्यक्ष वैदेशिक लगानी ६ अर्ब ६६ करोड रुपैयाँ रहेको थियो ।
चालु आर्थिक वर्षको ८ महिनामा शोधनान्तर स्थिति ३७ अर्ब ८४ करोड रुपैयाँले बचतमा रहेको छ। गत आवको सोही अवधिमा भने शोधनान्तर स्थिति ५८ अर्ब ९९ करोड रुपैयाँले घाटामा रहेको थियो ।

चालु आवको फागुनसम्ममा उपभोक्तम मुल्य वृद्धि पनि माघको तुलनामा घटेको छ । नेपाल राष्ट्र बैंकका अनुसार वार्षिक विन्दुगत आधारमा उपभोक्ता मूल्य सूचकाङ्कमा आधारित मुद्रास्फीति ६.७० प्रतिशत छ ।

आठ महिनाको औसत मुद्रास्फीति ६.५० प्रतिशत छ। चालु आर्थिक वर्षको ७ महिनामा यस्तो दर वार्षिक विन्दुगत आधारमा उपभोक्ता मूल्य सूचकाङ्कमा आधारित मुद्रास्फीति ६.८७ प्रतिशत थियो । सात महिनाको औसत मुद्रास्फीति ६.४७ प्रतिशत थियो ।