नेप्से दोस्रो दिन पनि घट्यो, जलविद्युत कम्पनीको शेयरमा भने आकर्षण

शेयर बजार सूचक मापक नेप्से दोस्रो दिन पनि घटेको छ । सोमबार ४.७२ अंकले घटेको नेप्सको गिरावट मंगलबार बढेर ७.२१ अंकमा पुगेको छ । घट्दो बजारमा जलविद्युत कम्पनीको शेयरमूल्यमा भने लगानीकर्ता आकर्षित बनेका छन् । जसले शेयरमूल्य बढ्ने अधिकांश कम्पनी यसै उपसमूहका रहेका छन् ।

लामो समयदेखि अंकित मूल्यभन्दा तल झरेका जलविद्युत कम्पनीको शेयरको भाउ बढ्न थालेपछि विस्तारै अंकित मूल्यभन्दा माथि पुग्न थालेको छ ।

मंगलबार कारोबार रकम १ अर्ब ८२ करोड ९८ लाख रुपैयाँ पुगेको छ । सोमबार १ अर्ब ६९ करोडको शेयर कारोबार भएकोमा मंगलबार कारोबार रकम १३ करोड रुपैयाँले बढेको हो ।

आज कुल १९२ कम्पनी ७३ लाख ५ हजार १११ कित्ता शेयर ३३ हजार ९३३ पटक खरीद बिक्री भएको छ । कारोबारमा आएका तीन उपसमूहका सूचक सकारात्मक बनेको बजारमा ९ वटा उपसमूहको सूचक ऋणात्मक रहेको छ ।

आज निर्जीवन बीमा उपसमुहको परिसूचक सबैभन्दा बढी ४४.९९अंकले घट्दा जीवन बीमा समुहको परिसूचक ४२.९६ अंकले ओरालो लागेको छ । लघुवित्त १३..५८ अंकले घट्दा बैंकिङ र होटल समान १० अंक बढीले घटेका छन् । घट्दो बजारमा जलविद्युत समुहको परिसूचकमा भने २८ अंकको वृद्धि भएको छ ।

बजार खुलेदेखि नै ओरालो गति समातेको नेप्से बजारको अन्त्यसम्म नै परिसूचक घटेर बन्द भएको छ । बीचमा केही सुधारको लक्षण देखिएपनि बिक्री चाप उच्च हुँदा बजारमा सूचक घट्न दबाब परेको थियो।

अधिकांश जलविद्युत कम्पनीको शेयरमूल्य बढ्यो

मंगलबार सूचक घटेपनि अधिकांश कम्पनीके शेयरमूल्य बढेको छ । जोशी, हिमालयन उर्जा, आँखुखोला, घलेम्दी, युनाइटेड मोदी, युनिभर्सल पावर, नेपाल फाइनान्स, पञ्चकन्या माइ हाइड्रोपावर, युनियन, र छ्याङ्दी हाइड्रोपावर कम्पनीके शेयरमूल्य सकारात्मक सर्किट लेबल (करिब १० प्रतिशत) मा बढेको छ ।

सर्पोट माइक्रोफाइनान्स, रिलायन्स फाइनान्सको धेरै घट्यो

आजको बजारमा सर्पोट माइक्रोफाइनान्स रिलायन्स फाइनान्स, र श्री इन्भेष्ट फाइनान्स कम्पनीको शेयरमूल्य घेरै घटेको छ । तीववटै कम्पनीको ३ प्रतिशत धेरैले मूल्य घटेको हो ।

साल्ट ट्रेडिङ्ग, इन्फिनिटी लघुवित्त, गुहेश्वरी मर्चेनट, सिटिजन्स बैंक, एनसीसी बैंक र आइसीएफसी फाइनान्सको शेयरमूल्य पनि २ प्रतिशत धेरैले ओरालो लाग्यो ।

अरुण कावेली पावरको उच्च कारोबार

आजको बजारमा अरुण कावेली पावरको सबैभन्दा धेरै ९ लाख ३० हजार कित्ता शेयर कारोबार भएको छ । कम्पनीको प्रतिकित्ता मूल्य १३ रुपैयाँले बढ्दै १७ करोड ४१ लाख रुपैयाँको शेयर खरीद बिक्री भएको हो ।

यसैगरी हिमाल दोलखा हाइड्रोपावरको १० करोड २२ लाख, नेपाल रि-इन्स्योरेन्सको ७ करोड ८१ लाख, अरुण भ्यालीको ७ करोड ७ लाख रुपैयाँको शेयर कारोबार भएको छ ।

एचआईडिसीएल, नेपाल बै.क, युनिभर्सल पावर कम्पनी, अपि पावर र नेशनल हाइड्रोपावर र कुमारी बैंक शीर्ष कारोबार हुने दश कम्पनीमा समेटिएका छन् । दशौं ठूलो रकमको कारोबार भएको कुमारी बैंकको ३ करोड ३८ लाखको शेयर कारोबारमा आएको हो ।