मर्जरमा रहेको स्वदेशी लघुवित्तको नाफामा आकर्षक बढोत्तरी, EPS ४८ रुपैयाँ माथि

एनआईसी एशिया लघुवित्तसँग मर्जर प्रकृयामा रहेको स्वदेशी लघुवित्त वित्तीय संस्था लिमिटेड (SDESI) ले चालु आर्थिक वर्षको पहिलो त्रैमासमा आफ्नो नाफामा आकर्षक सुधार गरेको छ ।

बुधबार सार्वजनिक भएको अपरिष्कृत वित्तीय विवरण असोज मसान्तसम्ममा लघुवित्तले ३ करोड ३३ लाख ९७ हजार रुपैयाँ खुद नाफा गर्दै वार्षिक प्रतिशेयर आम्दानी (इपिएस) ४८.४० रुपैयाँ कायम गरेको छ ।

गत आवको पहिलो तीन महिनमा लघुवित्तले १ करोड ९१ लाख ८० हजार रुपैयाँ खुद नाफा कमाएर वार्षिक ३३.३६ रुपैयाँ इपिएस कायम गरेको थियो। समीक्षा अवधिमा लघुवित्तको नाफा ७४.१३ प्रतिशतले बढेको हो ।

असोज मसान्तसम्ममा लघुवित्तको खुद ब्याज आम्दानी ३०.७२ प्रतिशत र सञ्चालन नाफा ७४.१३ प्रतिशतले बढेको छ । लघुवित्तले ९ करोड ९४ लाख रुपैयाँ खुद ब्याज आम्दानी र ५ करोड २४ लाख रुपैयाँ सञ्चालन नाफा कमाएको छ ।

२० प्रतिशतले चुक्ता पूँजी बढाएको लघुवित्तको चुक्ता पूँजी २७ करोड ६० लाख रुपैयाँ तथा जगेडा कोष ३२.६९ प्रतिशतले संकुचित भई १३ करोड ६८ लाख रुपैयाँमा खुम्चिएको छ ।

चालु आवको पहिलो त्रैमासमा १ अर्ब १८ करोड ७३ लाख रुपैयाँ निक्षेप संकलन तथा २ अर्ब ६९ करोड १६ लाख रुपैयाँ सापटी गरी ४ अर्ब १३ करोड १३ लाख रुपैयाँ कर्जा लगानी गरेको छ ।

लघुवित्तको प्रतिशेयर नेटवर्थ १४९.४५ रुपैयाँ, कोषको लागत ५.३१ प्रतिशत, खराब कर्जा अनुपात २.९९ प्रतिशत र मूल्य आम्दानी अनुपात १६.५३ गुणा छ ।

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।