नेप्सेमा ‘बाउन्सब्याक’ हुँदा लगाानीकर्ताको सम्पत्ति एकैदिन सवा खर्बले बढ्यो, नेप्से पौने ४% ले बढ्यो

साताको अन्तिम कारोबार दिन बिहीबार नेप्से परिसूचकमा बाउन्स ब्याक हुँदा बिहीबार मात्रै लगानीकर्ताको सम्पत्ति मापक कुल बजार पूँजीकरण १ खर्ब २४ अर्ब ९३ करोडले बढेको छ ।

नेप्सेमा ९० अंकको बढोत्तरी आएसँगै बुधबारको तुलनामा सबा खर्ब रुपैयाँले बजार पूँजीकरणमा सुधार आएको हो । बिहीबार कुल बजार पूँजीकरण ३४ खर्ब ५३ अर्ब ७४ करोड ३६ लाख रुपैयाँ पुगेको छ । बुधबार ३३ खर्ब २८ अर्ब ८१ करोड २४ लाख रुपैयाँ कूल बजार पूँजीकरण रहेको थियो ।

अघिल्लो साता ८२ अंकले घटेको नेप्सेले यस साताको आइतबार ८०, मंगलबार ६० र बुधबार ४० अंकले गिरावट बेहोरेको छ । यसबीचमा सोमबार ४० अंकले सुधार आएको बजारमा बिहीबार ९० अंकको उच्च बाउन्स ब्याक भएको हो । यद्यपी यति हुँदापनि बजार अघिल्लो बिहीबारको तुलनामा अझै ५२ अंक तल छ । अघिल्लो बिहीबार नेप्से सूचक २५५४ बिन्दुमा थियो ।

साताको अन्तिम कारोबार दिन बिहीबार नेप्से ३.७५ प्रतिशत अर्थात ९०.६७ अंकले बढेर २ हजार ५०० बिन्दुमाथि पुगेको छ । यस्तै ठूला कम्पनीहरुको सूचक मापक सेन्सेटिभ इन्डैक्सको सूचक १४.६७ अंकले बढेर ४५१.४६ अंकमा पुगेको छ ।

आज २०६ कम्पनीका १ करोड ६६ लाख २२ हजार ७६३ कित्ता शेयर ६५ हजार १७४ पटक खरीद बिक्री हुँदा कारोबार रकम ६ अर्ब ५ करोड ८१ लाख ४ हजार ३१७ रुपैयाँ पुगेको हो ।  बिहीबारको बजारमा कारोबारमा आएका सबै १३ उपसमुहका सूचकमा हरियाली छाएको छ । ब्यापार सूचक सबैभन्दा धेरै ७ प्रतिशत बढीले बढ्दा अन्य, लगानी र लघुवित्तको इन्डेक्समा पनि ५ प्रतिशत बढीको बढोत्तरी आएको छ ।

निफ्राको सर्वाधिक कारोबार

पूँजीबजारमा सूचीकृत कम्पनीमध्ये सबैभन्दा धेरै चुक्ता पूँजी रहेको नेपाल इन्फ्रास्ट्रक्चर डेभलपमेन्ट बैंक (निफ्रा) को बिहीबार सर्वाधिक कारोबार भएको छ ।

सुरुवाति कारोबार ५०८ मा कारोबार खुलेको बैंकको शेयर ८.६६ प्रतिशत अर्थात ४४ रुपैयाँले बढोत्तरी हुँदै ५५२ रुपैयाँमा कारोबार बन्द भएको हो । बिहीबार मात्रै बैंकको शेयरमा आकर्षण बढ्दा ९ लाख ८९ हजार ४९१ कित्ता शेयर ५३ करोड २३ लाख ९० हजार ६७६ रुपैयाँमा खरीद बिक्री भएको हो ।

यसैगरी शिखर इन्स्योरेन्सको २४ करोड, नबिल बैंककको २० करोड , नेपाल टेलिकमको १९ करोड, नेपाल लाइफको १८ करोड, ग्लोबल आइएमई बैंकको साढे १७ करोड, पुनर्बीमा कम्पनी र नेपाल बैंकको १६ करोड, एनआईसी एशिया बैंकको पौने १६ करोड र प्रभु बैंकको करिब १४ करोडको शेयर कारोबार भएको छ ।

दश कम्पनीको सकारात्मक सर्किट लेबलमा कारोबार

बिहीबारको बजारमा १० कम्पनीको शेयरमूल्य बढेर सकारात्मक सर्किट लेबलमा कारोबार भएको छ । यसदिन चन्दा्गिरी हिल्स, लिवर्टी इनर्जी, सूर्योदय लघुवित्त, किसान माइक्रोफाइनान्स, लक्ष्मी लघुवित्त, हिमालयन पावर पार्टनर, श्री इन्भेष्ट फाइनान्स, नेशनल हाइड्रोपावर, निर्धन उत्थान लघुवित्त र नेरुडे लघुवित्तको शेयरमूल्य करिब दश प्रतिशतले बढेको हो ।

निफ्रा, माउन्टेन हाइड्रोपावर, मेरो माइक्रोफाइनान्स, सपोर्ट माइक्रोफाइनान्सको शेयरमा लगानी गरेका लगानीकर्ताले ८ प्रतिशत धेरैले नाफा कमाउँदा बरुण हाइड्रोपावर, साल्ट ट्रेडिङ्ग, बैंक अफ काठमाण्डू र स्वाभिमान लघुवित्तको शेयरमूल्य पनि ७ प्रतिशत धेरैले बढेको छ ।

आजको बजारमा एभरेष्ट इन्स्योरेन्स संस्थापक, सोल्टी होटल, र युनिलिभर नेपाल लिमिटेडको शेयरमूल्य भने समान्य घटेको छ । यसदिन सामुहिक लगानी कोष एनएमबि ५० को इकाईमा लगानी गरेका लगानीकर्ताले सर्वाधिक ३.४५ प्रतिशतका दरले गुमाएका छ ।

आज कारोबार भएको शेयर कित्ताको आधारमा सनराइज फस्टको सबैभन्दा धेरै २२ लाख १५ हजार इकाईको कारोबार हुँदा कारोबार संख्याको आधारमा निफ्राको सबैभन्दा धेरै ११ हजार ७८५ पटक खरीद बिक्री भएको छ ।

? समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ।