सुन तस्करीमा संलग्न गिरोह विरुद्ध दुई अर्ब ५२ करोड राजश्व छलिको मुद्दा दर्ता

राजश्व अनुसन्धान विभागले सुन तस्करीमा संलग्न गिरोह विरुद्ध दुई अर्ब ५२ करोड ७७ लाख ९६ हजार ८८ रुपैयाँ राजश्व चुहावटको मुद्दा दर्ता गरेको छ ।

विभागले पटकपटक सुन चोरी पैठारी गरी राजश्व चुहावटमा संलग्न भारत कर्नाटक राज्य अब्दुल मजिद अनेकल, मुम्बई स्थायी ठेगाना भएका रोशन पटेल र यश इम्पोर्ट एण्ड एक्सपोर्ट कन्सर्नका सञ्चालक राजेश गुरुङ्ग बिरुद्ध मुद्दा दर्ता गरेको हो। उनीहरु विरुद्ध २ अरब ४३ करोड ४६ लाख ८० हजार ३ साय १६ रुपैया बिगो माग दाबी गरेको छ ।

जिल्ला प्रहरी कार्यालय हेटौँडाको प्रहरी टोलीले चेकजाँचको क्रममा रातोमाटे चेकपोष्टमा बिना बिल बिजक बसमा लैजाँदै गरेको ६ किलो २८९ ग्राम ३५० मिलिग्राम सुन बरामद गरी राजश्व अनुसन्धान कार्यालय पथलैयामा बुझाइएकोमा अनुसन्धान गर्दा राजश्व छलि गरेको पाइएपछि बैशाख १२ गते मुद्दा दर्ता गरिएको हो ।

यस्तै यश इम्पोर्ट एण्ड एक्सपोर्ट कन्सर्नका सञ्चालक राजेश गुरुङ्गको हकमा थप ४ करोड ३० लाख ७९ हजार ४३२ रुपैया, भैरब स्टोर्सका प्रोप्राइटर सञ्जिव श्रेष्ठको हकमा ४ करोड ५६ लाख ६८२७ रुपैया र का.म.न.पा. -२ बस्ने शंकर घिमिरेको हकमा ४ लाख २९ हजार पाँच सय तेह्र रुपैया विगो कायम गरी उच्च अदालत हेटौडामा मुद्दा दर्ता गरेको हो ।

अनुसन्धानका क्रममा भारत कर्नाटक राज्य बस्ने अब्दुल मजिद अनेकल, रोशन पटेल भनिने लुखमनुअल हाकिम र एश एम्पोर्ट एण्ड एक्सपोर्ट प्रालिका सञ्चालक राजेश गुरुङले पटकपटक सुन चोरी पैठारी गरेको पुष्टी भएको छ । उनीहरु बिरुद्ध २ अर्ब ४३ करोड ८६ लाख ८० हजार १ सय १६ रुपियाँ बिगो दाबी सहित मुद्दा दर्ता गरिएको हो ।

राजश्व चुहावट (अनुसन्धान तथा नियन्त्रण) ऐन २०५२ को दफा ४ (क)  र (ग) बमोजिम बिगो रकम असुल गरी सो को शतप्रतिशत जरिवाना र कैद सजायको माग दाबी सहित मुद्दा दर्ता गरिएको विभागले जनाएको छ ।

?  समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।