बजार पूँजीकरणमा पुनर्बीमा कम्पनीले टेलिकमलाई उछिन्यो

जेठ २४ गते सोमबार नेपाल पुनर्बीमा कम्पनीको शेयरमूल्य बढेर नेपाल टेलिकमको घट्दा सबैभन्दा धेरै बजार पूँजीकरण भएको नेपाल टेलिकमलाई पुनर्बीमा कम्पनीले उछिनेको छ ।

टेलिकमभन्दा ५ अर्बले चुक्ता पूँजी कम भएको नेपाल पुनर्बीमा कम्पनीको शेयरमूल्य बढेर उच्च पुग्दा बजार पूँजीकरणमा सधै नम्बर १ रहँदै आएको टेलिकमको ताज खोसिएको हो ।

सोमबार नेपाल पुनर्बीमा कम्पनीको शेयरमूल्य प्रतिकित्ता २६ रुपैयाँले बढेर १ हजार ९०१ रुपैयाँ पुग्दा कुल बजार पूँजीकरण १ खर्ब ९० अर्ब १० करोड रुपैयाँ नाघेको छ । उता नेपाल टेलिकमको शेयरमूल्य प्रतिकित्ता १२ रुपैयाँले घट्दा १ हजार २६५ रुपैयाँमा झरेको हो । शेयरमूल्य घटेसँगे टेलिकमको बजार पूँजीकरण १ खर्ब ८९ अर्ब ७५ करोडमा सीमित भएको हो ।

सोमबारको मूल्य अनुसार तेस्रो ठूलो बजार पूँजीकरण १ खर्ब ७७ अर्ब सहित नबिल बैंकको रहेको छ । नेपाल लाइफको १ खर्ब ४९ अर्ब र नागरिक लगानी कोषको १ खर्ब २३ अर्ब रुपैयाँ रहेको छ ।

छैटौं स्थानमा रहेको नेपाल इन्फ्रास्ट्रक्चर बैंकको १ खर्ब १४ अर्ब, ग्लोबल आइएमई डिबेञ्चर ८०।८१ को १ खर्ब ८ अर्ब, एनआईसी एशिया बैंकको १ खर्ब ५ अर्ब रुपैयाँ रहेको छ ।

ग्लोबल आईएमई बैंक ९८ अर्ब ६४ करोड सहित नवौं स्थानमा रहँदा अपर तामाकोशी ८४ अर्ब २९ करोड बजार पूँजीकरण सहित दशौं स्थानमा रहेको छ । कुल २४ कम्पनीको बजार पूँजीरकण ५० अर्बभन्दा धेरै रहेको नेप्सेले जनाएको छ ।

? समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।