चालिस प्रतिशत रद्द गर्दै छ्याङ्दीको १५० प्रतिशत हकप्रद घोषणा

छ्याङ्दी हाइड्रोपावर कम्पनीले यसअघि साधारण सभाबाट अनुमोदन गरेको चुक्ता पुँजीको ४० प्रतिशत हकप्रद बिक्री गर्ने प्रस्ताव रद्द गरेर १५० प्रतिशत हकप्रद बेच्ने घोषणा गरेको छ ।

कम्पनी सञ्चालक समितिको फागुन १२ गते शुक्रबार सम्पन्न बैठकले यस्तो निर्णय गरेको कम्पनी सचिव रमेश कुमार थापाले जानकारी दिए । कम्पनीको २०७८ पुस ३० गते सम्पन्न आठौं वार्षिक साधारण सभाले चुक्ता पूँजीको ४० प्रतिशत हकप्रद सेयर जारी गर्ने निर्णय गरेको थियो ।

पछिल्लो बोर्ड बैठकले पुरानाे प्रस्ताव रद्द गरी हालको चुक्ता पूँजीको १५० प्रतिशत अर्थात १ः१.५ को अनुपातमा हकप्रद सेयर जारी गर्ने भएको हो ।  कम्पनी सचिव थापाका अनुसार कम्पनीको फागुन १२ गते अपरान्ह ४ः३० बजे बसेको संचालक समितिको ९२ औ बैठकको निर्णय नं ४ बाट आठौं वार्षिक साधारण सभाले निर्णय गरेको हकप्रद रद्द गरी नियमनकारी निकायहरुबाट स्वीकृती प्राप्त भए पश्चात हालको चुक्ता पूँजीको १५० प्रतिशत अनुपातमा हकप्रद जारी गर्ने निर्णय भएको हो । बैठकले उक्त निर्णय कम्पनीले आगामी वार्षिक साधारण सभामा पेश गर्ने निर्णय गरेको छ ।

हाल कम्पनीको चुक्ता पुँजी ३८ करोड ६९ लाख ७७ हजार ५०० रुपैयाँ रहेको छ । प्रस्तावित ५८ करोड ४ लाख ६६ हजार २५० रुपेयाँको हकप्रद बिक्रीपछि कम्पनीको चुक्ता पुँजी ९६ करोड ७४ लाख ४३ हजार ७५० रुपैयाँ पुग्नेछ ।

यसअघि चुक्ता पुँजीको ३० प्रतिशत हकप्रद बेचेको कम्पनीले पछिल्लो दुई वर्षयता लगानीकर्तालाई लाभांश वितरण गरेको छैन । आव २०७५।७६ र ७६।७७ बाट भने कम्पनीले ५ प्रतिशत बोनस वितरण गरेको थियो ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।