आधारभूत वित्तीय सेवामा बैंकहरुले ग्राहकबाट शुल्क उठाउन नपाउने

बैंकहरुको पनि बैंक नेपाल राष्ट्र बैंकले बैंक तथा वित्तीय संस्थाहरुले ग्राहकलाई प्रदान गर्ने आधारभूत वित्तीय सेवाहरुमा कुनै पनि किसिमको शुल्क लिन नपाउने सूचना जारी गरेको छ ।

राष्ट्र बैंकको वित्तयि समावेशीता तथा ग्राहक संरक्षण महाशाखा अन्तर्गतको वित्तीय ग्राहक संरक्षण इकाइले वित्तीय चेतनाका लागि सूचना जारी गरेको हो ।

आधारभूत वित्तीय सेवामा सबैको पहुँच सहज हुनुपर्दछ भन्ने मान्यताका आधारमा बैंक तथा वित्तीय संस्थाले खाता खोल्दा, चेक जारी गर्दा (गुड फर पेमेन्ट चेक समेत), चेकको स्टप पेमेन्ट गर्दा र ब्यालेन्स सर्टिफिकेसन गर्दा, खाता सञ्चालन गर्दा, खाता बन्द गर्दा, स्टेटमेन्ट दिँदा, विप्रेषण रकम खातामा जम्मा गर्दा, निष्क्रिय खाता सक्रिय गराउँदा कुनै पनि किसिमको शुल्क लिन नपाउने व्यवस्था रहेको जनाएको छ ।

यसैगरी केन्द्रीय बैंकले मोबाइल/इन्टरनेट बैंकिङको युजरनेम/पासवर्ड हराएमा, दुई लाख रुपैयाँभन्दा कम रकमको चेक क्लियरिङ गर्दा र अन्तरशाखा कारोबार अर्थात एक शाखाको काम अर्को शाखाबाट गर्ने (एबीबीएस) लगायतका सेवा प्रदान गर्दा पनि बैंक तथा वित्तीय संस्थाहरुले सेवा शुल्क लिन नपाउने व्यवस्था राष्ट्र बैंकले गरेको छ ।

माथिका बाहेक अन्य सेवा बापतको शुल्क भने सम्बन्धित संस्थाले निर्धारण गर्नसक्ने राष्ट्र बैंकले जनाएको छ । वित्तीय सेवाको पारदर्शिताका लागि सेवा शुल्कसम्बन्धी विवरण सार्वजनिक रुपमा जानकारी गराउनुपर्ने प्रावधान रहेको छ ।

त्यसगरी बैंक तथा वित्तीय संस्थाले शुल्कसम्बन्धी विवरण (स्ट्यान्डर्ड ट्यारिफ एन्ड चार्जेन्ज) आफ्नो वेबसाइटमा प्काशन गर्नुपर्ने व्यवस्था केन्द्रीय बैंकले गरेको छ । राष्ट्र बैंकले ग्राहकहरुलाई कुनै पनि सेवा लिनुअघि सो सम्बन्धी विवरण अध्ययन गर्न पनि सचेत गराएको छ ।

विद्युतीय भुक्तानी तथा एटीएमबाट हुने कारोबार र कर्जा सम्बन्धी शुल्कहरुमा भने राष्ट्र बैंकबाट तोकिएको सीमाका आधारमा निर्धारण हुने उल्लेख छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ।