समता घरेलु लघुवित्तले अंकित मूल्यमा एफपीओ जारी गर्ने, बिक्री प्रबन्धक चयन

समता घरेलु लघुवित्त वित्तीय संस्था लिमिटेडले थप सार्वजनिक निष्काशन (फर्दर पब्लिक इस्यू एफपीओ) को लागि निष्काशन तथा बिक्री प्रबन्धक नियुक्ति गरेको छ ।

लघुवित्तले एफपीओ जारी गर्नका लागि मुक्तिनाथ क्यापिटल लिमिटेड नक्साल काठमाण्डौलाई नियुक्त गरेको हो । लघुवित्तले अंकित मूल्यमा ३ करोड ३२ लाख ८५ हजार ६०० रुपैयाँ बराबरको ३ लाख ३२ हजार ८५६ कित्ता बिक्री गर्नेछ ।लघुवित्तको प्रबन्धपत्रमा भएको व्यवस्था बमोजिम संस्थापक–सर्वसाधारणको सेयर संरचना अनुपात ७०ः३० कायम गर्न लघुवित्त कम्पनीले सर्वसाधारणमा थप सार्वजनिक निष्काशन (एफपीओ) बिक्री गर्न लागेको हो ।

लघुवित्तका कम्पनी सचिव विश्वराज श्रेष्ठले वित्तीय संस्थाको सञ्चालक समितिको १४३ औं बैठकको निर्णयानुसार निष्काशन तथा बिक्री प्रबन्धकमा मुक्तिनाथ क्यापिटललाई चयन गरेको जानकारी दिए । साेही अनुसार धितोपत्र निष्काशन तथा बिक्री प्रबन्धक सम्बन्धी सम्झौतापत्रमा सोमबार दुई पक्षबीच हस्ताक्षर सम्पन्न भएको छ ।

उक्त सम्झौता पत्रमा समता घरेलु लघुवित्त वित्तीय संस्था लिमिटेडको तर्फबाट प्रमुख कार्यकारी अधिकृत डा. मदन घिमिरे र मुक्तिनाथ क्यापिटल लिमिटेडको तर्फबाट प्रमुख कार्यकारी अधिकृत कबिन्द्र ध्वज जोशीले हस्ताक्षर गरेका थिए । सम्झौता–पत्रमा समता घरेलु लघुवित्त वित्तीय संस्थाको केन्द्रीय कार्यालय, बनेपा, काभ्रेमा हस्ताक्षर सम्पन्न भएको हो ।

यसअघि प्रतिकित्ता १५९ रुपैयाँ ७ पैसामा एफपीओ बिक्री गर्ने निर्णय गर्दै कम्पनीले २०७८ चैत २९ गते धितोपत्र बोर्डमा २ लाख ८९ हजार ४४० कित्ता एफपीओ बिक्रीका लागि कम्पनीले अनुमति मागेको थियो । तर कम्पनीको पुँजीमा पछिल्लो समय फेरबदल भएसँगै कम्पनीले अंकित मूल्यमा नै सेयर निष्कासन गर्ने भएको हो । यससँगै लघुवित्तको एफपीओ लगानीकर्ताले १०० रुपैयाँ दरमा नै एफपीओ खरिद गर्ने अवसर पाउने भएका छन् ।

विसं २०७९ चैत्र मसान्त सम्मको अधिकृत पूँजी ५० करोड रुपैयाँ, कुल जारी तथा चुक्ता पूँजी ४२ करोड ७४ लाख ४१ हजार ४२१ रुपैयाँ रहेको छ । चैत मसान्तसम्म कम्पनीको निक्षेप १ अर्ब १४ करोड ६३ लाख र सापटी १ अर्ब ५२ करोड ४० लाख रहँदा कुल कर्जा लगानी ३ अर्ब १० करोड रुपैयाँ रहेकोछ । समीक्षा अवधिमा कम्पनको खुद नाफा भने ७७ लाख ८० हजार रहेको छ । लघुवित्त वित्तीय संस्थाको हाल ६१ वटा शाखा कार्यालयहरु मार्फत कुल ६२ हजार ग्राहकहरुलाई सेवा दिँदै आइरहेको छ ।

यस्तै मुक्तिनाथ क्यापिटल लिमिटेड मुक्तिनाथ विकास बैंकको सहायक कम्पनी रहेको र नेपाल धितोपत्र बोर्डबाट स्वीकृत प्राप्त मर्चेन्ट बैंकर संस्था हो ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।