लगानीकर्ताले दसैं खर्चको जोहो गर्दा सेलिङ प्रेसर, नेप्सेमा उच्च गिरावट

बडा दशैं सुरु भएपछिको पहिलो कारोबार दिन सोमबार सेयर बजारमा उचच अंकको गिरावट आएको छ। नेप्सेका अनुसार आज बजार सूचांक २३.१६ अंकले घटेको हो ।

अघिकांश लगानीकर्ताहरु सेयर बिक्री गरी दसैं खर्च जुटाउनतर्फ लाग्दा बजारमा क्रेताभन्दा बिक्रेताको संख्या हाबी भएको हो । जसले बजार खुला भएदेखि नै सूचमा निरन्तर गिरावट आएको हो । नेपालमा हाल ‘टिप्लस टू’ को राफसाफ चक्र रहेको छ । यसअनुसार सोमबार बिक्री भएको धितोपत्रको भुक्तानी लगानीकर्ताले बिहीबार पाउने हुन्छ । बिहीबार नै दसैअधिका अनितम कारोबार दिन भएकाले सोमबारको बजारमा बिक्री चाप अधिक देखिएको हो । मंगलबारदेखिको सेयर बिक्रीको भुक्तानी दसैंअघि नपाउन पनि सकिने हुँदा यसदिनको बजारमा बिक्री चापकै कारण सूचक दिनभर ओरालो गतिमा रह्यो । कारोबारको अन्त्यमा नेप्से सूचक १८५१.४३ बिन्दुमा झरेर बन्द भएको छ ।

सूचीकृत २८४ कम्पनीहरुको ४८ लाख ३७ हजार ८९३ कित्ता सेयर ६९ हजार ८३२ वटा सङ्ख्यामा किनबेच हुँदा कारोबार रकम १ अर्ब २५ करोड ३२ लाख ९१ हजार ७१ रुपैयाँमा समेटिएको छ । नेप्से घटेसँगै आज कारोबार रकम पनि घटेको छ । अघिल्लो कारोबार दिन बिहीबार १ अर्ब ७० करोडको सेयर कारोबार भएकोमा ४५ करोडले कारोबार रकम घटेको हो ।

कारोबारमा आएका सबै १३ वटै उपसमुहगत सूचकमा गिरावट आएसँगै नेप्से ऋणात्मक बनेको हो । जीवन बीमा उपसूचक सर्वाधिक २.०९ प्रतिशतले घटेको सोमबारको बजारमा होटल तथा पर्यटन २.०४, हाइड्रोपावर २.०२, व्यापार १.९६, लघुवित्त १.५८, लगानी १.२८ र फाइनान्स १.२५ प्रतिशतले घटेको छ ।

घटेको बजारमा प्रभु बैंकको संस्थापक सेयर सर्वाधिक६ करोड २४ लाख रुपैयाँको कारोबार भएको छ । यस्तै भर्खरै दोस्रो बजारमा कारोबार खुला भएको हाथवे इन्भेष्टमेन्टको ५ करोड २७ लाख रुपैयाँको कारोबार भएको छ । यस्तै सिटिजन लाइफको ३ करोड ६६ लाख, रिलायबल नेपाल लाइफको ३ करोड ५८ लाख र एनआइसी एशिया बैंकको ३ करोड ४२ लाख रुपैयाँको सेयर खरिद बिक्री भएको छ ।

आज सिद्धार्थ प्रिमियम इन्स्योरेन्सको सेयर मूल्य सर्वाधिक ७.८७ प्रतिशत बढेर ७४० रुपैयाँ पुगेको छ । त्यस्तै सिद्धार्थ इन्भेष्टमेन्ट ग्रोथ स्किम—२ को इकाईमूल्य ७.३१ प्रतिशत, सुपर माई हाइड्रोपावरको ४.०४ प्रतिशत, कालिञ्चोक दर्शनको ३.९७ प्रतिशत र सनराइज फोक्स्ड इक्वीटी फन्डको ३.८५ प्रतिशतले मूल्य बढेको छ ।

यस दिन सयपत्री हाइड्रोपावर र हाथवे इन्भेष्टमेन्टको सेयरमूल्य नकरात्मक सर्किट लेभबमा घटेको छ । सयपत्री हाइड्रोपावरको प्रतिकित्ता ५९ रुपैयाँ ८० पैसा घटेर ५३८ रुपैयाँ २० पैसा र हाथवे इन्भेष्टमेन्टको प्रतिकित्ता ३४ रुपैयाँ ५० पैसा घटेर ३१० रुपैयाँ ५० पैसामा झरेको छ । यस्तै नबिल ब्यालेन्स्ड फन्ड–२ को ९.३१, मिड सोलु हाइड्रोपावर ९.०६ र घलेम्दी हाइड्रोपावरको ८.७७ प्रतिशतले घटेको छ ।

सोमबारको घटाईपछि सेयर बजारको कुल बजार पुँजीकरण २८ खर्ब ४१ अर्ब २९ करोड ३१ लाख २२ हजार रुपैयाँमा समेटिएको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।