साताको सुरुआतमै नेप्से ओरालोतर्फ, १७ अंकले घट्यो सूचक

यो साता सेयर बजार बढ्ने लगानीकर्ताको आशा विपरित यो साताको पहिलो कारोबार दिन सोमबार नै सेयर बजार मापक सूचक नेप्से १७.०१ अंकले घटेर बन्द भएको छ । यससँगै सूचक नेप्से परिसूचक २०३१.५५ बिन्दुमा कायम भएको छ । सोमबार सहित लगातार चार दिनमा नेप्से ४१.९६ अंकले घटेको हो । 

आज दोहोरो अंकले घटेको बजारमा ७० कम्पनीको सेयर मूल्य बढेको छ भने २२६ कम्पनीको सेयर मूल्य घटेको छ । ८ कम्पनीको मूल्य स्थीर रहेको छ । आज दिनभरमा ३०४ कम्पनीको ७० लाख ६१ हजार १२ कित्ता सेयर ४४ हजार २३६ पटक किनबेच हुँदा कारोबार रकम २ अर्ब ४८ करोड ९१ लाख १८ हजार ४८५ रुपैयाँमा समेटिएको छ ।

कारोबारमा आएका १३ उपसमूहगत सूचकमध्ये चार ओटाको बढेको छ भने ९ ओटाको घटेको छ । यस दिन उत्पादन तथा प्रशोधन मुलक २.१९ प्रतिशत, लघुवित्त २.२५ प्रतिशतले घटेको छ । बैंकिङ्ग, विकास बैंक र जलविद्युत परिसूचक पनि यस दिन १ प्रतिशतभन्दा धेरैले घटेको छ ।

सोमबार गोर्खाज फाइनान्सको सबैभन्दा धेरै २८ करोड ९० लाख २५ हजार रुपैयाँको बराबरको कारोबार भएको छ । यस्तै शिवम् सिमेन्टको १३ करोड ७८ लाख ७६ हजार रुपैयाँ, सोनापुर मिनरल्स एण्ड आयलको ८ करोड १३ लाख २३ हजार, हिमालयन रि इन्स्योरेन्सको ६ करोड २९ लाख र घोराही सिमेन्टको ५ करोड ८६ लाख रुपैयाँको सेयर किनबेच भएको छ ।

सबैभन्दा धेरै बोटलर्स नेपाल (बालाजू) लिमिटेडको सेयरमूल्यमा सकारात्मक सर्किट लागेको छ। १० प्रतिशतले बढेपछि कम्पनीको मूल्य १८ हजार २७६ रुपैयाँ ५० पैसा पुगेको छ । यस्तै सर्वोत्तम सिमेन्टका लगानीकर्ताले ९.९९ प्रतिशत, तारागाँउ रिजेन्सीका लगानीकर्ताले ८.०४ प्रतिशत, सिवाइसी नेपाल लघुवित्तको ७.४२ प्रतिशतले बढेको छ ।

किसान लघुवित्त वित्तीय संस्थाका लगानीकर्ताले आज सबैभन्दा धेरै गुमाएका छन् । आज यस कम्पनीका लगानकिर्ताले १० प्रतिशतका दरले गुमाउँदा प्रतिकित्ता मुल्य ९१८ मा झरेको छ। यस्तै बुद्धभुमि नेपाल हाइड्रोपावरको ९.९९ प्रतिशत, आत्मनिर्भर लघुवित्तको ८.८२ प्रतिशत, गुराँस लघुवित्तको ७.०१ प्रतिशत र युनिक नेपाल लघुवित्तको सेयर मूल्य ६.२५ प्रतिशतले घटेको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।