फागुनमा १७ करोड १७ लाख कित्ता धितोपत्र नेप्सेमा सूचीकृत, कुन कम्पनीको कति ?

चालु आर्थिक वर्षको फागुन महीनामा विभिन्न २० कम्पनीको ५ करोड ४८ लाख कित्ता बोनस र दुई कम्पनीको पौने १२ करोड कित्ता हकप्रद सेयर दोस्रो बजार (नेप्से) मा सूचीकृत भएको छ ।

नेप्सेको तथ्यांकअनुसार फागुनमा २० कम्पनीको ५ करोड ४८ लाख ३५ हजार ७५१ कित्ता बोनस सेयर र दुई कम्पनीहरु माथिल्लो तामाकोशी तथा घलेम्दी हाइड्रोपावरको हकप्रद गरी कुल ११ करोड ६९ लाख कित्ता हकप्रद सेयर सूचीकृत भएको हो । यस्तै यस अवधिमा नबिल बैंकको ३० लाख कित्ता इकाई ऋणपत्र पनि सूचीकृत भएको छ । सबैगरी कुल २३ कम्पनीको १७ करोड १७ लाख ३५ हजार ७५१ दशमलव ५४ कित्ता सेयर फागुनमा सूचीकृत भएको छ ।

सूचीकृत भएका २० कम्पनीको बोनस सेयरमध्ये चिलिमे हाइड्रोपावरको सबैभन्दा धेरै ७२ लाख ५८ हजार १८० कित्ता सेयर सूचीकृत भएको छ । आरएसडिसी लघुवित्तको सबैभन्दा कम छ । उक्त कम्पनीको ७ लाख ४७ हजार ८२८ दशमलव ६५ कित्ता सेयर सूचीकृत भएको हो ।

फागुनमा बोनस सूचीकृत भएका अन्य कम्पनीहरुमा सानिमा माइ हाड्रोपावर, मितेरी डेभलपमेन्ट बैंक, साइन रेसुङ्गा डेभलपमेन्ट बैंक, शिवम् सिमेन्ट, नेपाल इन्स्योरेन्स, राधी विद्युत्, हाथवे इन्भेस्टमेन्ट कम्पनी, सिटिजन्स लाइफ इन्स्योरेन्स, फस्र्ट माइक्रोफाइनान्स कम्पनी, छिमेक लघुवित्त वित्तीय संस्था, युनिभर्सल पावर, सोल्टी होटल, युनाइटेड अजोड इन्स्योरेन्स, जीवन विकास लघुवित्त, हिमालयन एभरेस्ट इन्स्योरेन्स, मुक्तिनाथ विकास बैंक, आरएसडीसी लघुवित्त, नेपाल एसबीआई बैंक र लुम्बिनी विकास बैंक रहेका छन् ।

माथिल्लो तामाकोशीले जारी गरेको एक बराबर एक अनुपातको १० करोड ५९ लाख कित्ता हकप्रद फागुन १० गते तथा घलेम्दी हाइड्रोपावरको १ बराबर १ अनुपातको १ करोड १० लाख कित्ता हकप्रद फागुन २७ गते गरी कुल ११ करोड ६९ लाख कित्ता हकप्रद पनि यो महीनामा सूचीकृत भएको छ । यस्तै नबिल बैंकको ‘९% नबिल डिबेञ्चर २०८७’ पनि फागुन ८ गते सूचीकृत भएको हो ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।