बजारमा लगानी रणनीति फेर्दै सेयर लगानीकर्ता, एकबाट ‘प्रोफिट बुक’ गरेर अर्कोमा लगानी ‘सिफ्ट’

सेयर बजारमा लामो समयदेखि कारोबारीको उत्साहजनक उपस्थित नरहेपनि चैत मसान्तको कर्जाको सावाँ तथा ब्याजको तनाव हट्न थालेपनि दैनिक कारोबार रकम ४ अर्ब माथि पुगेको छ ।

लघुवित्तको ऋण मिनाहा गर्नुपर्नेमाग राख्दै राजधानी केन्द्रित आन्दोलन थालेको संघर्ष समतिलाई सरकारी वार्ता समितिले सम्झौता गरेर फर्काएपछि लामो समयदेखि सुस्त रहेको लघुवित्तको सेयरमा चकम फर्कन पुग्यो । सोभन्दा अघि भर्खरै सेयर कारोबार खुलेका न्यून आपूर्ति रहेको र कम पुँजी भएका जलविद्युत कम्पनीको सेयर मूल्यमा कारोबारीको अधिक आकर्षण रहेको थियो ।

यो वर्ष सकिन लाग्दै बैंक तथा वित्तीय संस्थाबाट लिएको कर्जाको तेस्रो त्रैमासिक अवधिको किस्ता तथा करको झमेलाबाट लगानीकर्ता मुक्ता भएका छन् । यसले सेयर बजारमा लगानीकर्ताको उपस्थिति विस्तारै बाक्लिन थालेको छ ।

बजारमा दैनिक कारोबार साढे दुई अर्बबाट साढे १ अर्ब बढेर ४ अर्ब नाघ्न थालेपछि अल्पकालीन लगानीकर्ताहरुले एक समुहबाट भएको नाफा सुरक्षित गरेर अर्को समुहका कम्पनीको धितोपत्रमा लगानी गर्ने प्रवृत्ति देखिएको छ । सोही कारण मंगलबार वित्त, अन्य र निर्जीवन बीमा कम्पनीमा लगानीकर्ताले लगानी बढाएका छन् । यसअघि नाफा आर्जन भएका लघुवित्त, उत्पादन तथा प्रशोधनमुलक र जलविद्युत क्षेत्रमा भएको नाफा सुरक्षित गरेर सेयर लगानीकर्ताहरुले अब क्षेत्रगत लगानीमा जोडदिएका हुन् । यसले लघुवित्त, जलविद्युत र उत्पादनमुलक कम्पनीका सेयर मूल्य घट्दा फाइनान्स, अन्य र निर्जीवन बीमा कम्पनीको सेयरमा आकर्षण बढ्दा ती कम्पनीको धितोपत्र धेरै बढेका छन् ।

मंगलबार सेयर बजार परिसूचक नेप्से ९.१९ अंकले बढेर २०३६.०१ विन्दुमा पुगेको छ । मंगलबार ४ अर्ब १४ करोड ३७ लाख ८३ हजार ९८९ रुपैयाँ बराबरको ९७ लाख ८९ हजार ४१६ कित्ता सेयर ७२ हजार २६१ओटा संख्यामा कारोबार भएको छ ।

आजको बजारमा ३५% लाभांश घोषणा गरेको सुर्यज्योति लाइफ इन्स्योरेन्सको सबैभन्दा धेरै १८ करोड ८ लाख १० हजार रुपैयाँको सेयर कारोबार भएको छ । यस्तै गोर्खाज फाइनान्सको १६ करोड ५ लाख, हिमालयन रि इन्सयोरेन्सको १५ करोड ४५ लाख, नेपाल फाइनान्सको १५ करोड ३६ लाख र पोखरा फाइनान्सको १० करोड ४६ लाख रुपैयाँको सेयर कारोबार भएको छ । कारोबार कित्ताको आधारमा ३ लाख ६१ हजार सहितसुर्यज्योति लाइफ इन्स्योरेन्स र कारोबार संख्याको आधारमा ४ हजार १६१ सहित हिमालयन रि इन्सयोरेन्स शीर्ष स्थानमा रहेको छ ।

मंगलबार कारोबारमा आएका १३ उपसमूहगत सूचकमध्ये फाइनान्स उपसमुहगत सूचकमा लगानीकर्ताको आकर्षण कायमै देखिएको छ । वित्तको इन्डेक्स २.७९ प्रतिशतले बढेको छ । अन्य उपसमूहको सूचक २.४२ प्रतिशत र निर्जीवन बीमा उपसमूहको सूचक १ प्रतिशतले बढेको छ । उत्पादन तथा प्रशोधनमुलक सर्वाधिक १.४६ प्रतिशतले घटेको बजारमा लघुवित्त १.१४ प्रतिशत र होटल तथा पर्यटनमुलक ०.६८ प्रतिशतले घटेको छ । बाँकी १० ओटा उपसमूहगत सूचक सकारात्मक छन् ।

मंगलबारको बजारमा जानकी फाइनान्स, नेपाल फाइनान्स, पोखरा फाईनान्सको सेयर मूल्य १० प्रतिशतले बढेर सकारात्मक सर्किट लागेको छ । यस्तै इमजिङ्ग नेपालको ८.४५ प्रतिशत, प्रभु स्मार्ट फन्डको ८.३० प्रतिशत, उन्नति सहकार्य लघुवित्तको ७.७४ प्रतिशत र दोल्ती पावरको सेयरको भाउ ७.३७ प्रतिशतले बढेको छ ।

यता आजको बजारबाट वीन नेपाल लघुवित्तको सेयर मूल्य सबैभन्दा धेरै १० प्रतिशतले घटेको छ । महुली लघुवितको ५.३३ प्रतिशत, सबैको लघुवित्तको ४.४२ प्रतिशत, समता लघुवित्तको सेयर मूल्य ४.४२ प्रतिशत र बुद्धभुमि नेपाल हाइड्रोपावरको ३.९६ प्रतिशतले घटेको छ ।

मंगलबारको कारोबार समाप्तीसँगै कुल बजार पुँजीकरण बढेर ३२ खर्ब २८ अर्ब ३४ करोड ९३ लाख रुपैयाँमा समेटिएको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।