सुनको भाउमा गिरावट, आइतबार कतिमा हुँदैछ कारोबार ?

साताको पहिलो कारोबार दिन आज आइतबार सुनको भाउ प्रतितोला ५ सय रुपैयाँले घटेको छ । साताको अन्तिम कारोबार दिन शुक्रबार प्रतितोला २ हजार रुपैयाँ बढेको सुनको भाउ आइतबार ५०० रुपैयाँले घटेको हो ।

नेपाल सुनचाँदी व्यवसायी महासंघले आइतबारका लागि सुनको भाउ प्रतितोला १ लाख ६६ हजार रुपैयाँ निर्धारण गरेको छ । शुक्रबार प्रतितोला १ लाख ६६ हजार ५ सय रुपैयाँमा कारोबार भएको थियो ।

त्यस्तै चाँदीको भाउ पनि तोलामा २० रुपैयाँले घटेको छ । अघिल्लो दिन प्रतितोला १ हजार ९८० रुपैयाँ रहेको चाँदी आज १ हजार ९६० रुपैयाँमा कायम भएको छ ।
नेपालमा अन्तर्राष्ट्रिय बजारको आधारमा सुनचाँदीको मूल्य निर्धारण गर्ने गरिएको छ ।

आइतबार अन्तर्राष्ट्रिय बजारमा सुन प्रतिऔंस २ हजार ६८४.६४ अमेरिकी डलर र चाँदी प्रतिऔंस ३१.३ डलरमा कारोबार भइरहेको छ ।