तीनकुने, सिनामंगल र कोटेश्वर क्षेत्रमा कर्फ्यु लाग्यो, १० बजेसम्म हिँडडुल गर्न नपाईने

राजावादीहरुको प्रदर्शन हिंसान्तमक बन्दै गएपछि काठमाण्डौंको तीनकुने, कोटेश्वर र सिनामंगल क्षेत्रमा कर्फ्यु लगाइएको छ । पुर्वनिर्धारित कार्यक्रम हुने स्थलमा भेला हुन थालेका प्रदर्शनकारीहरु एकाएक आगजनी तथा तोडफोडमा उत्रिएसिछ सुरक्षा संवेदनशीलतालाई ध्यानमा राखेर प्रकाशनले कर्फ्यु आदेश जारी गरेको हो ।

सुरक्षाकर्मीले स्थिति नियन्त्रणमा लिन नसकेपछि जिल्ला प्रसाशन कार्यालय, काठमाण्डौंले तीनकुनेलाई केन्द्र बनाएर कोटेश्वर र सिनामंगल क्षेत्रमा कर्फ्यु आदेश जारी गरेको हो । जिल्ला प्रशासन कार्यालय काठमाण्डौंका सहायक प्रमुख जिल्ला अधिकारी एवं प्रवक्ता अशोक कुमार भण्डारीका अनुसार बालकुमारी पुल, भक्तपुरतर्फ जडिबुटी पुल, सिनामंगलतर्फ गौशाला पुग्ने पुल र नयाँ बानेश्वरतर्फको क्षेत्रमा राती १० बजेसम्मका लागि कर्फ्यु लगाइएको हो । अवस्था हेरेर कर्फ्युको अवधि बढाउन सकिने पनि उनले नोटबजारलाई बताए ।

राजावादीहरुको प्रदर्शनको नेतृत्व गरेका दुर्गा प्रसाईले सुरक्षा घेरा तोडेर जबरजस्ती आफ्नो गाडी नयाँ बानेश्वरतिर बढाएपछि प्रदर्शनकारीहरुले हिंसात्मक गतिविधिलाई तिब्र बनाएका थिए । तीनकुने क्षेत्रका नीजि घरहरुमा तोडफोड तथा आगजनी गरेका उनीहरुले तीनकुने क्षेत्रमा हिंसात्मक गतिविधि बढाएका थिए ।

सुरक्षाकर्मीमाथिको आक्रमण, आगजनीसँगै प्रदर्शनकारीले पेरिसडाँडास्थि माओवादीको पार्टी कार्यालयमा तोडफोड तथा आगजनीको प्रयास गरेका थिए भने सोही स्थानमा सरकारी गाडी तथा मोटरसाइकलमा आगजानी गरेका थिए ।
तीनकुनेस्थित बागमती करिडोरमा रहेको नेकपा एसको पार्टी कार्यालयमा तोडफोड गरेका प्रदर्शनकारीले कोटेश्वरस्थित प्रहरीवृत्तमा पनि तोडफोडको प्रयास गरेका थिए । कोटेश्वरस्थित भाटभटेनीमा पनि तोडफोडको प्रयास भएको थियो ।

• भाटभटेनी आक्रमणको भिडियो सामाजिक सञ्जालमा

यता सिनामंगलस्थित नागरिक उड्डयन प्राधिकरणको कार्यालयमा पनि राजावादी प्रदर्शनकारीहरुले तोडफोड गरेका छन् ।

तीनकुने आसपासका क्षेत्रमा बढेको तनाव, तोडफोडका घटना नियन्त्रण गर्न नेपाल प्रहरी तथा शसस्त्र प्रहरीले नसक्ने अवस्था आएपछि प्रशासनले ती क्षेत्रमा राती १० बजेसम्मका लागि कर्फ्यु आदेश जारी गरेको हो । अहिले ती क्षेत्रमा सुरक्षाकर्मीले कर्फ्यु आदेश जारी भएको सम्बन्धमा माइकिङ गर्दै बाहिर ननिस्किन आग्रह गरिरहेका छन् ।

प्रदर्शनकारीहरु पनि क्रमिक रुपमा तितरबितर हुँदै गएका छन् । जडिबुटी तथा बालकुमारी आसपासका क्षेत्रमा प्रदर्शनकारीहरुको भिड देखिन थालेको छ ।