दाङमा थप एकजनामा संक्रमण पुष्टि, कोरोना संक्रमितको संख्या ४५४

दाङमा थप एकजनामा कोरोना संक्रमण पुष्टि भएसँगै नेपालमा कुल संक्रमितको संख्या ४५४ पुगेको छ।

राप्ती स्वास्थ्य विज्ञान प्रतिष्ठानमा आज गरिएको नमूना परीक्षणका क्रममा घोराही उपमहानगरपालिका-३ का ३७ वर्षीय पुरुषमा संक्रमण देखिएको हो।

यसअघि आज बिहान र दिउँसो गरेर एकैदिन २६ जनामा संक्रमण भेटिएको थियो।

झापाको कचनाकवल गाउँपालिकाको लक्ष्मीप्रसाद देवकोटा माविको क्वारेन्टाइनमा रहेका १७, १८, १८, २०, २०, २३, ५२ र ५५ वर्षका ८ जनामा कोरोना संक्रमण पुष्टि भएको हो ।

त्यस्तै झापा कचनवल वडा र्न ३, ६ र ८ का १५ जना पुरुष, धनकुटामा १ जना पुरुष र धरानकी ५१ वर्षिय एक महिलामा संक्रमण पुष्टि भएको हो।

यस्तै, रुपन्देहीका २७ वर्षीय पुरुषमा संक्रमण देखिएको हो । उनीहरु स्वास्थ्यकर्मीको सम्पर्कमा रहेको र उनीहरुको अवस्था सामान्य रहेको बताइएको छ ।

नेपालमा अहिलेसम्म तीनजनाको कोरोना संक्रमणकै कारण मृत्यु भइसकेको छ भने ४९ जना बिरामी निको भएर घर फर्किसकेका छन्।