एकाबिहानै थप ३० जनामा कोरोना पुष्टि, कूल संख्या ४८७ पुग्यो

नेपालमा थप ३० जनामा कोरोना भाइरस संक्रमण देखिएको छ। नवलपरासी, कपिलवस्तु, सर्लाही र चितवनमा थप ३० जना नयाँ कोरोना संक्रमित भेटिएका हुन्।

स्वास्थ्य तथा जनसंख्या मन्त्रालयका  अनुसार राष्ट्रिय अनुसन्धान प्रयोगशाला काठमाडौ र भरतपुर चितवनमा गरिएको परीक्षणमा थप ३० जनामा संक्रमण पुष्टि भएको हो। 

यो सँगै नेपालमा कोरोना संक्रमितको संख्या ४८७ पुगेको छ।

नेपालमा कोरोना भाइरस संक्रमणका कारण हालसम्म ३ जनाले ज्यान गुमाइ सकेका छन् ।

थपिएका संक्रमितमा नवलपरासी (बर्दघाट सुस्ता पूर्व) विनय त्रिवेणी गाउँपालिका–६ मा ४५ वर्षीय पुरुष, भरतपुर महानगरपालिका–६ केसरबाघ चितवनमा ७४ वर्षीय पुरुष र ७३ वर्षीया महिला छन् ।

यस्तै, नवलपरासी सुस्ता गाउँपालिका–५ र रामग्रामका ३३ र ३५ वर्षीय पुरुष तथा १५ वर्षीया महिलामा पनि कोरोना भाइरसको संक्रमण पाइएको छ ।

कपिलवस्तु वाणगंगा नगरपालिका र मायादेवी गाउँपालिकाका २४, २५, २७, २९, ३४, ३६, ४५, ५३ वर्षीय पुरुषहरू तथा आठ वर्षीया बालिकामा संक्रमण पाइएको छ । सर्लाहीको गोडैता–८, ९, ११, १३ र १४ र रामनगर बहुअर्वा गाउँपालिका–७ का २२, २२, २४, २५, २५, २७, ३२, ३४, ३४, ३५, ३८, ३८, ३८, ३९ वर्षीय पुरुषहरू र १८ वर्षीया महिलामा पनि भाइरस संक्रमण पाइएको छ ।