दुई कम्पनीले ६८ करोडको आईपीओ निष्कासनका लागि मागे अनुमति

नेपाल धितोपत्र बोर्ड (सेबोन) मा दुई कम्पनीले ६८ करोड रूपैयाँ बराबरको साधारण शेयर (आईपीओ) निष्कासन गर्न नियामक निकायसँग अनुमति माग गर्दै निवेदन पेश गरेका छन् ।

आईएमई लाइफ इन्स्योरेन्सले एक सय रूपैयाँ अंकित दरमा ६० करोड रूपैयाँ बराबरको ६० लाख कित्ता र रूरू जलविद्युत् परियोजना कम्पनीले ८ करोड ९६ लाख ९५ हजार २२० रुपैयाँको ८ लाख १५ हजार ४११ कित्ता आइपीओ जारी गर्न अनुमति मागेका हुन् ।

आइएमई लाइफ इन्स्योरेन्स कम्पनी लिमिटेडले असार २२ गते र रूरू जलविद्युत परियोजनाले असार २५ गते साधारण शेयर निष्कासन गर्न सेबोनमा निवेदन पेश गरेका हुन् ।

आइएमई लाइफको बिक्री प्रबन्धकको काम सिभिल क्यापिटल मार्केट र रूरू जलविद्युत् परियोजनाको बिक्री प्रबन्धकको काम एनएमबी क्यापिटलले गर्नेछ ।

आइएमई लाइफले प्रतिशेयर १०० रूपैयाँको दरमा ६० लाख कित्ता र रूरू जलविद्युतले स्थानियका लागि छुट्याइएको १० प्रतिशत शेयर प्रतिशेयर १०० रूपैयाँको दरमा ४ लाख ७ हजार ७०५ कित्ता र सर्वसाधारणका लागि छुट्याइएको १० प्रतिशत शेयर प्रतिशेयर १२० रूपैयाँको दरमा बिक्री गर्न अनुमति मागेको हो । कम्पनीले सर्वसाधारणमा अंकित मूल्यमा २० रुपैयाँ थप प्रिमियम सहित आईपीओ निष्काशनको माग गरेको हो। 

रुरु कम्पनीको आईपीओलाई इक्रा नेपालले इक्रा एनपी आईपीओ ग्रेड ४ प्लस रेटिङ्ग दिएको छ। ग्रेड ४ प्लस रेटिङ्गले कम्पनीको अवस्था औषतभन्दा तल आधार रहेको जनाउँछ।

इस्योरेन्सको आईपीओलाई केयर रेटिङ्ग नेपालले केयर एनपी आईपीओ ग्रेड ४ रेटिङ्ग प्रदान गरेको छ । ग्रेड ४ रेटिङ्गले कम्पनीको वित्तीय अवस्था औषत भन्दा कमजोर रहेको जनाउँछ ।