पूँजी बजार सम्बन्धी निबन्ध लेखन प्रतियोगिता आयोजना हुने, प्रथमलाई २० हजार पुरस्कार

नेपाल धितोपत्र बोर्डका कर्मचारी युनियनले विश्व लगानीकर्ता सप्ताह २०२० का अवसरमा पूँजी बजार सम्बन्धी निबन्ध पहिलो राष्ट्रिय लेखन प्रतियोगिता आयोजना गर्ने भएको छ ।

कर्मचारी युनियनले आयोजना गरेको पूँजी बजार सम्बन्धी निबन्ध लेखन प्रतियोगितामा नेपालभरका शैक्षिक संस्थामा अध्ययनरत स्नातकोत्तर र एमफिल दर्शनाचार्यसम्म अध्ययन गरिरहेका विद्यार्थीहरुले विभिन्न ६ वटा शिर्षकमध्ये एकमा निबन्ध लेख्नुपर्नेछ ।

देशको द्रुततर विकासमा पुँजी बजारको भुमिका, पूँजी बजार मार्फत महिला सशक्तिकरण, वित्तीय साक्षरता र पूँजी बजार, पूँजी बजार, सेवा प्रवाह र संस्थागत सुशासन, प्रभावकारी पूँजी बजारका लागि सूचना प्रविधि र कोभिड १९ र अबको पूँजी बजार शिर्षकमा निबन्ध लेख्न सकिनेछ । यसरी लेखिएको निबन्ध असोज १४ गतेभित्र इमेल मार्फत पठाउनुपर्नेछ ।

निबन्ध बढीमा ४ हजार शब्द नबढाई नेपाली भाषाको लागि प्रिती फन्ट १४ र अंग्रेजीको लागि टाइम्स न्यू रोमन फन्ट १२ मा टाइप गरिएको, चारैतिर १ इन्च मार्जिन छोडिएको, जस्टिफाई भएको हुनुपर्नेछ ।

निबन्धका साथमा सम्बन्धित कलेज वा विश्वविद्यालयको परिचयपत्रको प्रतिलिपी समावेश भएको हुनुपर्नेछ, भने सहभागीले निबन्धमा सम्पर्क ठेगाना, फोन नं. र इमेल अनिवार्य रूपमा उल्लेख गर्नुपर्नेछ। नेपाल धितोपत्र बोर्ड, नेपाल स्टक एक्सचेञ्ज तथा सिडिएससीका कर्मचारीहरु प्रतियोगितामा सहभागी हुन पाउने छैनन् ।

प्रतियोगितामा प्रथम हुनेलाई २० हजार, दोश्रो र तेश्रो हुनेलाई क्रमशः १५ हजार र १० हजार रुपैयाँ पुरस्कार तथा सम्मान पत्र पाउनेछन् । त्यस्तै, अन्य ३ जनालाई प्रोत्साहन सहित नगद ५ हजार र सम्मान पत्र उपलब्ध हुनेछ ।

प्रतियोगिताको नतिजा २०२० को अक्टोबर महिनामा मनाइने विश्व लगानीकर्ता सप्ताहको अन्तिम दिन प्रकाशन गरिने छ। उत्कृष्ट ठहरिएका लेखहरु समेटेर युनियनले पुस्तक प्रकाशन गर्ने पनि जनाइएको छ ।

समग्र अर्थतन्त्र र शेयर बजारको नियमित अपडेटका लागि नोटबजार डटकमको फेसबुक पेजका साथै ट्वीटर र युट्युबमा फलो गर्न सक्नुहुन्छ ।