फेष्टिभ मुडमा लगानीकर्ता, कारोबार १ अर्बभन्दा तल झर्यो, सूचकमा भने दोहोरो अंकको वृद्धि

नेपालीहरुको ठूलो चाड बडा दशैं सुरु भएपछि शेयर बजारमा त्यसको असर देखिएको छ । दैनिक २ अर्ब बढीको शेयर कारोबार हुँदै आइरहेको बजारमा चाडबाडको सिजन ‘फेष्टिबल मुड’ को असर साताको दोस्रो कारोबार दिन कारोबार रकम१ अर्बभन्दा तल झरेको छ ।

बजारमा गरिएको लगानीबाट चाडवाडका लागि खर्च जोहो गर्ने क्रम बढेको छ । यसले एकातिर आफ्नो लगानीको हिस्सा बिक्री गरेर खर्च निकाल्ने र अर्कोतर्फ शेयर बजारमा थप लगानी भित्र नसक्दा बजारमा खरीद बिक्रीको रौनक विस्तारै घट्दै गएको छ । आज बडा दशैंको तेस्रो दिन हुँदा बजारमा रौनकता घट्दै गएपनि नेप्से सूचकमा भने एकाएक दोहोरो अंकको वृद्धि देखिएको छ ।

आज १८९ कम्पनीको शेयर कारोबारमा आएकोमध्ये १४० कम्पनीको शेयरमूल्य बढेको छ भने १० कम्पनीको शेयरमूल्य घटेको छ भने छ । १५ कम्पनीको शेयमूल्य स्थीर रहेको छ ।

सोमबार ३३ लाख ५३ हजार २०१ कित्ता शेयर १५ हजार ४७८ पटक कारोबार हुँदा ९७ करोड ९० लाख ९४ हजार रुपैयाँको खरीद बिक्री भएको छ । नेप्सेसँगै ठूला कम्पनीको शेयर मापक सूचक सेन्सेटिभ इन्डेक्स पनि बढेको छ ।

आज नेप्से १३.५८ अंक अर्थात ०.८७ प्रतिशतले घटेर १ हजार ५७० दशमलव ३८ बिन्दुमा अडिएको छ । यस्तै सेन्सेटिभ इन्डेक्स २.६२ अंकले बढेर ३१० दशमलव ८९ बिन्दुमा रहेको छ । बजार बढेसँगै समग्र बजार पूँजीकरण १८ अर्ब १३ करोडले सुधार भई २० खर्ब ९६ अर्ब ८३ करोड ५२ लाख रुपैयाँमा पुगेको छ । आइतबार २० खर्ब ७८ अर्ब ७० करोड रुपैयाँ पूँजीकरण थियो।

आज कारोबारमा ब्यापार बाहेक सबै उपसमूहका सूचक सकारात्मक बनेको छ । ब्यापार सूचक ०.१६ प्रतिशतले ऋणात्मक रहेको बजारमा जलविद्युत उपसमूहको सूचक सबैभन्दा धेरै ३.३१ प्रतिशत, वित्त १.९८, र निर्जीबन बीमाको इन्डेक्स १.२९ प्रतिशतले बढेको छ । आजको बजारमा विकास बैंक, बैंकिङ्ग, होटल, उत्पादन, लघुवित्त, अन्य, जीबन बीमा र म्युचुअल फण्ड उपसमूहका परिसुचक पनि सामान्य अर्थात १ प्रतिशतभन्दा कमले सकारात्मक रहे ।

• जनरल इन्स्योरेन्स सहित ५ कम्पनीके शेयरमूल्यमा सकारात्मक सर्किट

आजको बजारमा जनरल इन्स्योरेन्स सहित ५ कम्पनीको शेयरमूल्य ९ प्रतिशतभन्दा धेरैले बढेर सकारात्मक सर्किट लागेको छ ।

गत बुधबार (असोज २८) देखि कारोबारमा आएको कम्पनीको शेयरमूल्य चौथो कारोबार दिन पनि सकारात्मक सर्किट लागेको हो । प्रतिकित्ता ३०५ रुपैयाँमा शेयर कारोबार खुलेको कम्पनीको शेयर सोमबार १३९ रुपैयाँ बढेर ४४४ रुपैयाँ पुगेको छ ।

यसैगरी आजको बजारमा युनियन हाइड्रोपावर, घलेम्दी हाइड्रोपावर, अपि पावर र दीब्यश्वरी हाइड्रोपावरको मूल्य ९ प्रतिशत धेरैले बढेको हो । बरुण हाइड्रोपावर, माउन्टेन हाइड्रो नेपाल, आँखुखोला हाइड्रोपावर, रिलायन्स लाइफ र युनिभर्सल पावर कम्पनीाको शेयरमूल्य पनि ७ प्रतिशत धेरैले सुधारिएको छ ।

• शेयरमूल्य घट्नेको २ प्रतिशतभन्दा कम मात्रै

सोमबार कारोबारमा आएका कम्पनीमध्ये शेयरमूल्य घट्ने कम्पनीहरुको पनि २ प्रतिशतभन्दा कमले मात्र घटेको छ । गणपति माइक्रोफाइनान्स, एनसीसी बैंक संस्थापक, र नेपाल सेवा लघुवित्तको साढे १ प्रतिशत बढीले शेयरमूल्य घटेको छ ।

• अपि पावरको उच्च कारोबार

आज अपि पावरको ४ करोड २ लाखको उच्च कारोबार भएको छ । पहिलो चरणको ४७ प्रतिशत हकप्रद जारी गर्ने मिति नजिकिएसँगै कम्पनीको शेयर कारोबार उच्च भएको छ । दशैंलगत्तै कम्पनीले हकप्रद शेयर जारी गर्दैछ ।

यसैगरी अरुण काबेली पावरको ३ करोड ५२ लाख, एनसीसी बैंकको ३ करोड ५० लाख, र नागरिक लगानी कोषको ३ करोड ९ लाखको शेयर कारोबार भयो ।

शिखर इन्स्योरेन्स, सिटिजन्स बैंक, नेशनल हाइड्रोपावर, नेपाल रि इन्स्योरेन्स आइसीएफसी फाइनान्स र सानिमा माई हाइड्रोपावरको पनि उच्च कारोबार भएको छ ।

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।