मेगा बैंकको लिलामी शेयर नपरेको रकम फिर्ता सुरु

मेगा बैंक (MEGA) को लिलामी शेयरको बिक्री प्रबन्धक मेगा क्यापिटलले असोज ११ गतेदेखि १८ गतेसम्म लिलामीमा आवेदन गरेर शेयर प्राप्त गर्न नसकेको लगानीकर्ताको रकम फिर्ता सुरु गरिएको जनाएको छ ।

एक साताअघि शिलबन्दी बोलपत्र खुला गरेर पनि अझैपनि लगानीकर्ताले रकम फिर्ता नपाएको गुनासोमा नोटबजारसँग कुरा गर्दै क्यापिटलको प्रतिनिधिले भने ‘हामीले हिजोदेखि नै रकम फिर्ताको प्रकृया सुरु गरिसकेका छौं । मेगा बैंकमा खाता हुनेहरुका लागि अहिलेसम्म रकम जम्मा भैसकेको छ भने अन्य बैंक तथा वित्तीय संस्थाहरुमा खाता भएका आवेदकहरुलाई पनि आईपीएस मार्फत फिर्ता गर्ने प्रकृया थालिएको छ ।’

यता लगानीकर्ताहरु भने दशैंको मुखमा रकम फिर्ता नगरेको भन्दै क्यापिटलको कार्यशैलीप्रति असन्तुष्टि पोखेका छन् ।

बैंकको शेयर लिलामीमा आवेदन गरेका एक लगानीकर्ताले भने ‘मेगा क्यापिटलले दशैंको समयमा लिलामीका लगानीकर्ताको रकम फिर्तामा ढिलाई गरेर आफ्नो असल छाप कायम गर्न सकेको छैन । मेगा क्यापिटलले भने शिलबन्दी बोलपत्र खुला भएको एक सातापछि हिजो मात्र बाँडफाँड गरिएको सूचना आज प्रकाशन गरेर दशैंपछि मात्र रकम फिर्ता गर्ने सोच बनाएको देखिन्छ । ’

उनका अनुसार यसअघिका गुराँस लाइफ, शिखर, प्रुडेन्सियल इन्स्योरेन्सहरुको बिक्री प्रबन्धकहरुले बोलपत्र खुला गरेको दुई तीन दिनभित्रमा नै शेयर बाँडफाँड गरेर त्यसको भोलिपल्ट नै रकम फिर्ता थाल्ने गरेका थिए । यसअनुसार क्यापिटलले पनि लिलामी शेयर नपाउनेलाई अबिलम्ब रकम फिर्ता गर्नुपर्ने उनको भनाई छ ।

क्यापिटलले असोज ११ देखि १८ गतेसम्म सर्वसाधारण समूहको ७ लाख ७ हजार ३९४ कित्ता र सस्थापक समूहको ११ लाख ३३ हजार ३४४ कित्ता शेयरमा परेको शिलबन्दी बोलपत्र असोज २९ गते खुला गरेको थियो । बैंक सञ्चालक समितिको बैठकले एक सातापछि कार्तिक ५ गते बिहीबार बाँडफाँड गरेको छ ।

बैंकले लिलामीमा ल्याएको साधारण शेयरको कटअफ मूल्य २१६.२० रुपैयाँ र संस्थापक शेयरको कटअफमूल्य ११० रुपैयाँ कायम भएको छ । सो मूल्यभन्दा बढीमा बोलपत्र पेश गरेका लगानीकर्ताले लिलामीको शेयर प्राप्त गरेका छन् । कटअफमूल्यभन्दा कम मूल्यमा आवेदन गर्नेहरुलाई भने आवेदनको बेला उल्लेख गरिएको बैंक खातामा नै आईपिएस मार्फत लिलामी आवेदन रकम फिर्ता सुरु गरिएको क्यापिटलले जनाएको छ ।

बैंकको लिलामी शेयरमा सर्वसाधारण समुहका लागि ५ हजार ३१ वटा र संस्थापक समूहमा ११९ वटा आवेदन परेको थियो ।

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।