विजय लघुवित्तको नाफा घटेसँगै प्रतिशेयर आम्दानीमा १४ रुपैयाँ संकुचन

विजय लघुवित्त वित्तीय संस्था लिमिटेड (VLBS) को खुद नाफा साढे २१ प्रतिशतले घटेपछि वार्षिक प्रतिशेयर आम्दानीमा १४.७० रुपैयाँले गिरावट आएको छ ।

गत आवको यसै अवधिमा वार्षिक प्रतिशेयर आम्दानी ४६.२० रुपैयाँ रहेकोमा चालु आवको प्रथम त्रैमासमा ३१.५० रुपैयाँमा झरेको हो ।

चालु आर्थिक वर्षको प्रथम त्रैमासमा कम्पनीले १ करोड ७६ लाख ४५ हजार रुपैयाँ खुद नाफा कमाएको छ । गत आवको यसै अवधिमा २ करोड २५ लाख रुपैयाँ खुद नाफा आर्जन गरेकोमा ४८ लाख ५५ हजार रुपैयाँले नाफा घटेको हो ।

असोज मसान्तसम्ममा लघुवित्तले ८३ करोड ८५ लाख ९८ हजार रुपैयाँ निक्षेप संकलन तथा २ अर्ब ७८ करोड १३ लाख रुपैयाँ सापटी लिएर ३ अर्ब ७६ करोड ८९ लाख रुपैयाँ कर्जा लगानी गरेको छ । यसबाट कम्पनीले गत आवको यसै अवधिको तुलनामा ५७ लाख रुपैयाँ धेरै ६ करोड ७२ लाख रुपैयाँ खुद ब्याज आम्दानी गरेको छ ।

लघुवित्तको खुद ब्याज आम्दानी बढेपनि सम्भावित जोखिम बापतको व्यवस्था वापत ३ करोड ७१ लाख रुपैयाँ व्यवस्था गनुपर्दा लघुवित्त ३५ लाख ४९ हजार रुपैयाँ सञ्चालन नोक्सानीमा पुगेको छ । यद्यपी कम्पनीले ३ करोड २२ लाख २५ हजार रुपैयाँ बराबरको खराब कर्जा उठाएपछि कम्पनी १ करोड ७६ लाख नाफा कमाएको हो ।

चुक्ता पूँजी २२ करोड ४० लाख रुपैयाँ रहेको लघुवित्तको जगेडा कोषमा १२ करोड ४२ लाख रुपैयाँ सञ्चित छ । असोज मसान्तसम्ममा खराब कर्जा अनुपात ३.४४ प्रतिशत, लघुवित्तको प्रतिशेयर नेटवर्थ १५५.४७ रुपैयाँ र मूल्य आम्दानी अनुपात २८.८९ गुणा छ ।

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।