मौद्रिक नीतिमा लगानीकर्ताहरुको सुझाव: सेयर जोखिम भार घटाउँदै १२ करोडको कर्जा सीमा हटाइयोस्

सेयर बजारमा क्रियाशिल सेयर लगानीकर्ताहरुको तीन संघ संस्थाहरुले मौद्रिक नीतिको अर्धवार्षिक समीक्षा मार्फत जोखिम भारित औसतलाई घटाएर अघिल्लो नीतिले निर्धारण गरेको १२ करोडको कर्जा सीमा हटाउन सुझाव दिएका छन् ।

नेपाल इन्भेष्टर्स फोरम, सेयर लगानीकर्ता संघ नेपाल र नेपाल पुँजीबजार लगानीकर्ता संघका प्रतिनिधिहरुले राष्ट्र बैंक आर्थिक अनुसन्धान विभाग बालुवाटारमा ४ बुँदे सुझाव पेश गरेका हुन् ।

नेपाल इन्भेष्टर्स फोरमका अध्यक्ष तुलसी राम ढकालले विद्यमान १२ करोडसम्मको सेयर कर्जाको सीमाले सेयर बजारलाई निरुत्साहित गरेकोले सो व्यवस्थालाई फिर्ता लिनका लागि लगानीकर्ताहरुले सुझाव दिएको बताए ।

यस्तै सुझावमा सेयरको जोखिम भारित औसतलाई १०० प्रतिशत नै कायम गर्न पनि सुझाव पेश गरिएको छ । आ.व. २०७९–८० को असार १ गतेदेखि सेयर कर्जाको जोखिमभार वृद्धि गरे १५० प्रतिशत पुर्‍याएको थियो ।

लगानीकर्ताहरुको संघहरुले पेश गरेको सुझावमा तरलता समस्या र विद्यमान व्याजदरले लगानी निरुत्साहित हुन गएकोले उक्त व्याजदरमा पुनरावलोकन गरी एकल अङ्गमा कायम गर्न माग गरिएको छ । यस्तै तरलता समस्याले देशको अर्थतन्त्रमा नकारात्मक अवस्था श्रृजना हुन गएकोले उक्त समस्याको तत्काल समाधान गर्ने व्यवस्था मौद्रिक नीतिको समीक्षामा समेट्न अनुरोध गरिएको छ ।

वर्तमान समयमा नेपाल राष्ट्र बैंकबाट पूँजीबजारलाई तत्काल माथिका बुँदाहरूलाई सम्बोधन गर्दा खस्कँदो अवस्थामा रहेको पूँजीबजारलाई पुनरुत्थान गर्न सधाउन पुग्ने लगानीकर्ताहरुको विश्वास रहेको छ ।  “पूँजीबजार देशको अर्थतन्त्रको ऐना हो” भन्ने मान्यतालाई आत्मसात गर्दै लगानीकर्ताहरूले सेयर बजारमा लगानी गरेतापनि राज्यबाट उचित संरक्षण र सुरक्षाको प्रत्याभुति नपाएको उनीहरुले बताएका छन् ।

राज्यको पहलकदमी नभएकै कारणले ३२ सय अङ्गभन्दा माथि पुगेको सेयर बजारको परिसूचक (नेप्से) हाल २०९० को हाराहारीमा घट्न पुगेको छ । यस्तै सेयर बजारको पूँजीकरण करिब ४५ खर्ब भन्दा बढी पुगिसकेको अवस्थामा हाल आएर ३० खर्बको तल्लो अङ्गमा झरिसकेको अवस्था छ । बजार पुँजीकरणमा १५ खर्बको नोक्सानीभई आफ्नो सम्पत्ति घट्दा लगानीकर्ताका मनोबल गिर्न गई मर्माहत र दुःखी हुँदै आइरहेका छन् ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।