वित्तीय विवरणले बिक्री चाप बढे पनि घट्दो मूल्यमा शेयर उठाउने झनै सक्रिय

धितोपत्रको दोस्रो बजारमा सूचीकृत अधिकांश कम्पनीहरुले गत आर्थिक वर्षको वित्तीय विवरण सार्वजनिक गरिसकेको अवस्थामा शेयर बजारमा नकारात्मक प्रभाव परेको छ । 

कोरोना कहरको मार खेपेका अधिकांश कम्पनीहरुले नाफा घटेको वित्तीय विवरण सार्वजनिक गरेपछि लाभांश घट्ने सोचमा शेयर बिक्रीमा चाप पर्दा धेरैजसो कम्पनीको शेयर मूल्य ओरालो लागेको छ । बिक्रीको चाप पर्दा अधिकांश कम्पनीको शेयर मूल्य घट्दा सस्तो मूल्यमा शेयर उठाउनेहरु सक्रिय हुँदा कारोबार रकममा भने सुधार आएको छ । अल्पकालीनभन्दा पनि दीर्घकालीन लगानी गर्नेहरुले शेयर खरिदको क्रम बढाएका हुन् ।

कोरोनाका कारण ठप्प रहेका उद्योग धन्दालाई राहत तथा सहुलियत दिनुपर्दा बैंकको आम्दानीमा असर पुगेको हो । नेपाल राष्ट्र बैंकले कोरोना प्रभावीत उद्योग व्यवसायलाई ब्याजदरमा छुट दिने तथा कर्जा तिर्ने समय अवधि थप गरेपछि बैंकहरुको आम्दानी प्रभावित भएको छ ।

कतिपय बैंकहरुको नियामकिय व्यवस्था वापतको खर्च समेत बढेको छ । यसले पनि नाफा प्रभावित भयो । जसले गर्दा अधिकांश वाणिज्य बैंकहरुको शेयर मूल्य घटेको छ । नेपाल बैंकको भने शेयर मूल्य बढेर उच्च कारोबार भएको छ ।

सरकारले कोरोना संक्रमणको दर बढ्न थालेपछि कोरोना रोकथाम तथा नियन्त्रणका लागि अघोषित लकडाउन लागू गरेपछि शेयर बजारको चमक हराउन थालेको छ । कोरोनाको त्रास बढ्दै जाँदा सरकारले बैंक तथा वित्तीय संस्था लगायत सरकारी तथा गैरसरकारी कार्यालहरुमा आलोपालो प्रणालीसहित अधिकतम ५० प्रतिशत कर्मचारीबाट काम चलाउन निर्देशन जारी गरेको छ ।

त्यस्तै नेप्सेले पनि ब्रोकर कार्यालयहरुलाई स्वास्थ्य सुरक्षाका मापदण्डहरु पालना गर्दै भौतिकभन्दा पनि अनलाइन कारोबार गर्न गराउन जोड दिएको छ । सवारी साधानमा पनि जोर-बिजोर प्रणाली लागू भएको छ । यसले गर्दा ब्रोकर कम्पनीहरुमा लगानीकर्ताको चहलपहल कम हुँदै जाँदा कारोबार शिथिल हुँदै गएको छ ।

बजारका लगानीकर्ताहरुको पनि शेयर खरीदभन्दा बिक्रीमा चाप परेको हो । तर बजार तल झरेको अवस्थामा सस्तो मूल्यमा शेयर खरिद गर्नेहरु बढेपछि कारोबार रकम भने बढेको छ ।

आइतबार बजार खुल्नासाथ २७ अंकसम्म झरेको बजार केहि सुध्रिएर बजार बन्द हुने समयसम्म आईपुग्दा १७.३३ अंकले घटेर १३९१.४६ विन्दुमा झरेको छ । १८५ कम्पनीको १ अर्ब २५ करोड रुपैयाँ बढीको कारोबार भएको बजारमा ४३ लाख ७१ हजार ८५४ कित्ता शेयर खरिदबिक्री भएका छन् ।

यस दिन कारोबारमा आएका व्यापार समूह बाहेक सबै समूहका सूचक घटेका छन् । जीवन बिमा समूह सबैभन्दा धेरै ७६ अंकले घटेको छ । वाणिज्य बैंक समूह पनि झण्डै २० अंकले घटेको छ ।

साधना लघुवित्त र छ्याङ्दी हाइड्रोको शेयर भाउ करिब १० प्रतिशतका दरले बढेको छ । आखुँखोलाको शेयर मूल्य सबैभन्दा धेरै ७.४१ प्रतिशतले घटेर ५० रुपैयाँमा झरेको छ । नेपाल बैकको सबैभन्दा धेरै ८ करोड १४ लाख रुपैयाँभन्दा बढीको कारोबार भयो ।

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।