अधिकांश वाणिज्य बैंकहरुको भन्दा नारायणी विकास बैंकको शेयर मूल्य माथि, हकप्रदकै पछि दौडँदै लगानीकर्ता

केही समयअघि समस्याग्रस्त संस्थाबाट फुकुवा भएको नारायणी डेभलपमेन्ट बैंकको शेयर मूल्यमा हरेक दिन सकारात्मक सर्किट लाग्ने गरेको छ । प्रतिशेयर आम्दानी ७ रुपैयाँ नोक्सानीमा रहेको बैंकको हकप्रदका पछि लगानीकर्ता लागेपछि दैनिक मूल्य बढेर कारोबार हुने गरेको छ ।

चालु आर्थिक वर्षको पहिलो त्रैमासमा ४७ लाख रुपैयाँ नोक्सानीमा रहेको बैंकले चुक्ता 

वृद्धिका लागि एक बराबर एक अनुपातमा हकप्रद शेयर निष्कासन गर्ने योजनामा छ । बैंकले हकप्रद निष्कासनका लागि धितोपत्र बोर्डमा आवेदन गरिसकेको छ । बैंकको सो हकप्रद आउने भएपछि लगानीकर्ता संस्थाको वित्तीय अवस्थालाइ समेत ध्यानमा नराखी उच्च मूल्यमा शेयर कारोबार गरेका हुन् ।

नेपाल राष्ट्र बैंकले गत साउनमा मात्र समस्याग्रस्त संस्थावाट हटाएर एक बरावर एक कित्ता हकप्रद शेयर जारी गर्न अनुमति दिएको छ । बैंकले हकप्रद शेयर निष्काशनको अनुमती माग्दै नेपाल धितोपत्र बोर्डमा पनि निवेदन दिएको छ । हाल ६ करोड ५६ लाख १३ हजार रुपैयाँ चुक्त पूँजी रहेको बैंकको हकप्रदपछि पनि चुक्ता पूँजी १३ करोड १२ लाख रुपैयाँ पुग्नेछ । बैंकले आगामी २ वर्ष भित्र ५० करोड रुपैयाँ चुक्ता पूँजी पुर्याउनुपर्छ ।

बैंकले आफैँ कारोबार गर्न वा मर्जरमा जान पनि ५० करोडको चुक्ता पूँजी पर्याउनुपर्ने हुन्छ । त्यसका लागि संस्थालाई २ वर्षको अवधि रहेको छ । यो अवधिमा पनि तोकिएको चुक्ता पूँजी पुर्याउन बैंकलाइ सहज छैन । चुक्ता पूँजी नपुर्याएको खण्डमा संस्थालाई पुन: केन्द्रीय बैंकले कारबाही गर्छ ।

नेपाल स्टक एक्सचेन्ज (नेप्से) मा यहि मंसिर १८ गते देखि कारोबार सुरु भएको बैंकको शेयर कारोबार यसभन्दा अघि २०७० पुस २२ गते बैंकको प्रतिकित्ता शेयर ४३५ रुपैयाँमा कारोबार भएको छ । पटक करिब ७ वर्षपछि २०७७ मंसिर १८ गते कारोबार भएको सो दिन बैंकको आर्थिक वर्ष आर्थिक वर्ष २०६६/६७ को नाफाबाट शेयरधनीलाई दिएको ५० प्रतिशत बोनस शेयर सूचीकण भइ शेयर मूल्य समायोजन गरेर प्रतिकित्ता २९५ रुपैयाँमा कारोबार भएको छ ।

नेप्सेमा मंसिर २१ गतेको शेयर कारोबारमा प्रतिकित्ता ५ रुपैयाँ मात्र बढेको छ । त्यसपछि नेप्सेमा बैंकको ४ दिन कारोबार भएको छ । कारोबार भएका पछिल्ला ४ दिन नै बैंकको शेयर मूल्य १० प्रतिशतका दरले बढेको छ । अर्थात बढ्दो सर्किट प्रयोग भएको अवस्था छ । यो अवधिमा बैंकको ८ हजार ९१० कित्ता शेयर खरिद बिक्री भएको छ ।

राष्ट्र बैंकले गत साउन ८ गते नै नारायणीलाई समस्याग्रस्तको सूचीबाट हटाएको हो । बैंकको खराब कर्जा ४० प्रतिशतभन्दा बढी भएको र तोकिएको चुक्ता पूँजी नपुगेको कारण बैंक समस्याग्रस्त घोषणा भएको थियो । समस्याग्रस्त भएपछि राष्ट्र बैंकले नारायणी बैंकलाई ५० करोड रुपैयाँ चुक्ता पुँजी पुर्याउन निर्देशन दिएर कारोबार बन्द गराएको थियो । तोकिएको पूँजीको २५ प्रतिशत पूँजी पुर्याएपछि राष्ट्र बैंकले समसस्या ग्रस्तबाट फुकुवा गरेको हो । बाँकी ७५ प्रतिशत पूँजी आगामी २ वर्षभित्र पुर्याउनपर्ने हुन्छ ।

बैंक २०५८ साल काक्तिक १ गते ३ करोड रुपैयाँ पूँजीले चितवनको रत्ननगरमा स्थापना भएको थियो । राष्ट्र बैंकबाट ३ जिल्ले कार्यक्षेत्रको अनुमति पाएको बैंकले चितवन, मकवानपुर र नवलपरासीमा वित्तीय सेवा प्रवाह गरिरहेको थियो । बैंकको तत्कालिन अध्यक्ष उत्तमप्रसाद झा र बैंकका तत्कालिन महाप्रवन्धक बीरेन्द्र श्रेष्ठको मिलोमतोमा करिब २४ करोड रुपैयाँ हिनामिना भएपछि समस्यामा आएको थियो।

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।