वाणिज्य बैंकहरुको चुक्ता पूँजी ३ खर्ब ६२ अर्ब पुग्यो, जगेडा कोषमा २ खर्ब ३२ अर्ब सञ्चित

चालु आर्थिक वर्षको चैत मसान्तसम्ममा वाणिज्य बैंकहरुको चुक्ता पूँजी ३ खर्ब ६२ अर्ब ९३ करोड ६ लाख रुपैयाँ पुगेको छ । विसं २०७७ चैतमा ३ खर्ब १९ अर्ब ३४ करोड ९९ लाख रुपैयाँ रहेकोमा पछिल्लो एक वर्षमा ४३ अर्ब ५८ करोड रुपैयाँले बढेको हो । प्रतिशतका आधारमा यो वृद्धि औषतमा १३.६५ प्रतिशत रहेको छ ।

चालु आवको तेस्रो त्रैमाससम्ममा ग्लोबल आईएमई बैंकको चुक्ता पूँजी २३ अर्ब ७९ करोड ५७ लाख रुपैयाँ रहेको छ । अघिल्लो चैतको तुलनामा बैंकको पूँजी दश प्रतिशतले बढेको हो ।

यस्तै धेरै पूँजी हुनेमा कृषि विकास बैंकको १९ अर्ब ७० करोड, प्राइम कमर्सियल १८ अर्ब ६५ करोड, नबिल बै.क १८ अर्ब ४९ करोड एनएमबी १८ अर्ब ३६ करोड र नेपाल इन्भेष्टमेन्ट बैंकको १८ अर्ब ३० करोड रुपैयाँ रहेको छ । यस अवधिमा सिभिल बैंकको चुक्ता पूँजी सबैभन्दा कम ९ अर्ब ७ करोड रुपैयाँ रहेको छ । स्ट्याण्डर्ड चार्टड, एभरेष्ट, सेञ्चुरी र नेपाल एसबिआई बैंकको चुक्ता पूँजी १० अर्बभन्दा कम छ ।

यस अवधिमा राष्ट्रिय वाणिज्यको बैंकको चुक्ता पूँजी सबैभन्दा बढी ५१ प्रतिशत र दोस्रो ठूलो नबिल बैंकको ३७.२१ प्रतिशतले बढेको छ । आरबिबिले एनआईडिसी डेभलपमेन्ट बैंक प्रापती तथा गत आवको नाफाबाट ३० प्रतिशत बोनस वितरण गरको हो भने नबिल बैंकले युनाइटेड फाइनान्स प्राप्ती तथा ३३.६० प्रतिशत बोनस वितरण गरेको थियो । सोही कारण यी दुई बैंकको चुक्ता पूँजी अधिक बढेको हो ।

सिटिजन्स, हिमालयन, र कृषि विकास बैंकले २० प्रतिशतले पूँजी बढाउँदा थप १३ बैंकको चुक्ता पूँजी दश देखि बीस प्रतिशतसम्म बढेको छ । यस अवधिमा एनसीसी बैंक, लक्ष्मी, सनराइज, कुमारी, एभरेष्ट, सेञ्चुरी कमर्सियल, सिभिल, नेपाल एसबिआई बैंकको चुक्ता पूँजी सिंगल डिजिट प्रतिशतमा बढेको छ । राष्ट्र बैंकले प्रस्तावित लाभांश वितरणमा रोक लगाएपछि एनआईसी एशिया बैंकको चुक्ता पूँजी स्थीर रहेको छ ।

जगेडा कोषमा २ खर्ब ३२ अर्ब सञ्चित, एनआईसी एशिया बैंकको सर्वाधिक बढ्यो

चालु आवको चैत मसान्तसम्म २७ वाणिज्य बैंकको जगेडा कोषमा कुल २ खर्ब ३२ अर्ब ७८ करोड ५० लाख रुपैयाँ सञ्चित हुन पुगेको छ ।

विसं २०७७ चैतमा २ खर्ब २१ अर्ब ३८ करोड ९ लाख रहेकोमा समीक्षा अवधिमा ५.१५ प्रतिशतले बैंकहरुको जगेडा कोषको आकार बढेको हो । जगेडा कोषमा सञ्चित रकमका आधारमा नेपाल बैंकको जगेडा कोषमा २० अर्ब २५ करोड सञ्चिच रहँदा नेपाल बैंकमा १७ अर्ब ९२ करोड र नबिल बैंकको जगेडा कोषममा १६ अर्ब ६९ करोड रुपैयाँ सञ्चित रहेको छ ।

गत आवको नाफाबाट लाभांश वितरण गर्न नपाएपछि यस अवधिमा एनआईसी एशिया बैंकको जगेडा कोष सर्वाधिक बढेको छ । बैंकको जगेडा कोष ४६.९० प्रतिशतले बढेर १२ अर्ब ७३ करोड ३४ लाख रुपैयाँ पुगेको हो । लक्ष्मी बैंकको जगेडा कोष सबैभन्दा धेरै घटेको छ । बैंकको जगेडा कोष १३ प्रतिशतले घटेर ४ अर्ब ८३ करोड ९२ लाख रुपैयाँ रहेको छ ।

चैतसम्म नेपाल बैंक, नबिल बैंक, बैंक अफ काठमाण्डू, एभरेष्ट, र कृषि विकास बैंकको जगेडा कोष घटेको छ । स्ट्याण्डर्ड चार्टर्ड बैंक, प्राइम कमर्सियल, सानिमा, नेपाल इन्भेष्टमेन्ट, एनएमबि, हिमालयन, प्रभु, सिटिजन्स, नेपाल बंगलादेश,सिद्धार्थ र राष्ट्रिय वाणिज्यको जगेडा कोष सिंगल डिजिटको प्रतिशतमा बढोत्तरी भएको छ ।

यस अवधिमा नेपाल एसबिआई,सनराइज,माछापुच्छ्रे, मेगा, कुमारी र ग्लोबल आईएमई बैंकको जगेडा कोष दशदेखि २० प्रतिशतको बीचमा बढेको छ । समीक्षा अवधिमा सेञ्चुरी कमर्सियल बैंकको जगेडा कोष ४३.४३ प्रतिशत, सिभिल बैंक २३.५६, र एनसीसी बैंकको २१.३६ प्रतिशतले बढेको छ ।

जगेडा कोषममा रकमका आधारमा नेपाल इन्भेष्टमेन्ट चौथो, कृषि विकास पाँचौं, एनआईसी एशिया छैटौं, एभरेष्ट बैंक सातौं, ग्लोबल आईएमई बैंक आठौं ठूलो छ । यी बैंकको जगेडा कोषमा १० अर्बभन्दा बढी १५ अर्बभन्दा कम रकम सञ्चित छ । समीक्षा अवधिमा लक्ष्मी बैंक, एनसीसीबैंक, माछापुच्छ्रे बैंक, सिभिल बैंक र सेञ्चुरी कमर्सियल बैंक जगेडा कोषमा सञ्चित रकमका आधारमा कमजोर देखिएका छन् । यी बैंकमा ५ अर्बभन्दा कम जगेडा कोष रहेको छ । सबैभन्दा कम जगेडा कोष रहेको सेञ्चुरीमा २ अर्ब ३० करोड ८१ लाख रुपैयाँ सञ्चित छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।