अन्य आयोजनामा असर नपारी माथिल्लो अरुणको स्रोत व्यवस्थापन गर्न विश्व बैंकलाई प्रधानमन्त्रीको आग्रह

विश्व बैंक दक्षिण एशिया क्षेत्रका उपाध्यक्ष मार्टिन रेजरले प्रधानमन्त्री पुष्पकमल दाहाल ‘प्रचण्ड’सँग शिष्टाचार भेट गरेका छन ।

भेटका अवसरमा प्रधानमन्त्री दाहालले विश्व बैंकसँगको नेपालको ६ दशक भन्दा लामो सहकार्यको स्मरण गर्दै नेपालले विकास प्रक्रियामा भोग्नु परेका जलवायुजन्य चुनौतीहरु र हरित विकासका सम्भावना बारे छलफल गरे।

विश्व बैंकले नेपालको आर्थिक तथा सामाजिक विकासमा खेलेको भूमिका प्रति धन्यवाद दिँदै मुख्यतस् जलविद्युतको विकासको लागि वित्त व्यवस्थापनमा विश्व वैंकले खेलेको समन्वयकारी भूमिकाको लागि धन्यवाद दिए।

माथिल्लो अरुण आयोजनाको लागि विश्व बैंकले वित्तीय स्रोत जुटाउन बहन गरेको समन्वयकारी पहलको लागि धन्यवाद दिंदै नेपाल सरकारको प्राथमिकतामा रहेको सो आयोजना कार्यान्वयनका लागि स्रोत व्यवस्थापन गरिँदा अन्य आयोजनाहरुमा स्रोतको कमी हुन नदिने तर्फ ध्यानाकर्षण गराए।

नेपालको जलविद्युत विकासबाट नेपाल मात्र नभई छिमेकी मुलुकहरु- भारत तथा बंगलादेश समेत लाभान्वित हुने साथै हरित र स्वच्छ उर्जाको विकासबाट जलवायु परिवर्तनका असरहरु न्यूनीकरण भै क्षेत्रीय तथा विश्वका सबै जनताले प्रत्यक्ष वा अप्रत्यक्ष रुपमा लाभ पाउने बताए।

हालै भएको भारत भ्रमणको क्रममा भारतीय प्रधानमन्त्री नरेन्द्र मोदीले संयुक्त पत्रकार सम्मेलनमा नेपाल भारत दीर्घकालीन सम्झौता मार्फत आगामी १० वर्षमा १० हजार मेगावाट विद्युत लैजाने घोषणा गरेको सन्दर्भ उल्लेख गर्दै यसले जलविद्युत विकासमा नयाँ संभावना खोलेको बताए साथै नेपालको जलविद्युत विकासमा सहकार्य गर्न बंगलादेशसंग पनि छलफल भैरहेको जानकारी गराए ।

भेटका क्रममा बैंकका उपाध्यक्ष मार्टिनले नेपालको आर्थिक तथा सामाजिक विकासमा सक्दो सहयोग गर्न विश्व बैंक सधै तत्पर रहेको बताउँदै उपलब्ध साधन र स्रोतको अधिकतम उपयोग गर्न सुझाव दिए । सुधारका क्षेत्रमा हातेमालो गर्न विश्व बैक सधै अग्रसर हुने प्रतिबद्धता जनाए।

सो अवसरमा विश्व वैंकका तर्फबाट पूर्वाधार क्षेत्र हेर्ने उपाध्यक्ष वांग्जी चेन, उपक्षेत्रीय निर्देशकफारिस हद्दाद जर्भोस लगायत विश्व बैंक तथा अर्थ मन्त्रालयका अधिकारीहरुको समेत उपस्थिति रहेको थियो।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।