अधिक तरलता भएपछि अन्तिम त्रैमासमा पाँचौं पटक रिभर्स रिपो, मंगलबार फेरि २० अर्ब खिच्दै राष्ट्र बैंक

बैंकिङ प्रणालीमा अधिक तरलता भएपछि नेपाल राष्ट्र बैंकले चालु आर्थिक वर्षमा पाँचौं पटक रिभर्स रिपो जारी गरेको छ । यसअघि चार पटक तरलता खिचेको राष्ट्र बैंकले अन्तिम त्रैमासमा मात्रै रिभर्स रिपोबाट तरलता प्रशोचन गरेको छ ।

केन्द्रीय बैंकले मंगलबार २० अर्ब रुपैयाँको रिभर्स रिपो जारी गरेको छ । तरलता व्यवस्थापनका लागि १४ दिने अवधिको वित्तीय औजार रिभर्स रिपो जारी गरेको हो । रिर्भस रिपोमा सहभागी हुन बैंकहरुले आज दिउँसो ३ बजेसम्म अनलाइन बिडिङ गर्नुपर्नेछ । परेको बोलकबोलबाट भारित औसतमा ब्याजदर निर्धारण गरिनेछ ।

यसअघि राष्ट्र बैंकले असार १९ गते २० अर्ब, असार १० गते २० अर्ब रुपैयाँ र असार ७ गते १० अर्ब रुपैयाँ बैंकिङ प्रणालीबाट तानेको थियो । यसअघि २०७९ चैत १० गते पनि ५ अर्बको रिभर्स रिपो जारी गरिएको थियो । राष्ट्र बैंकले नीतिगत दरलाई ७ प्रतिशतमा राखेको भए पनि अन्तरबैंक निकै तल झरेको छ । नेपाल राष्ट्र बैंकले दर नीतिगत दरभन्दा अन्तरबैंक रद २ प्रतिशतभन्दा तल झरेमा बजारबाट तरलता प्रशोचन गर्ने गर्दछ ।

अघिक तरलता हुँदा केन्द्रीय बैंकलाई ब्याजदर करिडोर अनुसार ब्याजदर कायम गर्न गाह्रो परेको छ । केन्द्रीय बैंकका अनुसार असार २४ गते आइतबार अन्तरबैंक ब्याजदर १.३६ प्रतिशतमा रहेको छ । चालु आर्थिक वर्ष सकिन लाग्दा बैंकहरुमा निक्षेप संकलन बढिरहेको छ तर कर्जाको माग नहुँदा बैंकहरुमा लगानीयोग्य रकम थुप्रिएको छ ।

अहिले बैंकहरुमा लगानीयोग्य रकम थुप्रिएपछि ट्रेजरी विल्सको ब्याजदर दुई वर्ष यताकै न्यून बिन्दुमा झरेको छ । यस्तै विकास ऋणपत्रको ब्याजदर पनि डेढ वर्ष यताकै न्यून विन्दुमा छ । निक्षेप बढेसँगै असार २४ गते आइतबार बैंकहरुको औसत कर्जा निक्षेप अनुपात (सिडी रेसियो) ८२.०३ प्रतिशतमा झरेको छ । यस अवधिमा प्रणालीमा कुल निक्षेप ५७ खर्ब १५ अर्ब र कुल कर्जा लगानी ४८ खर्ब ६१ अर्ब रुपैयाँ रहेको छ । 

बैंकिङ प्रणालीमा एकैदिन २५ अर्ब रुपैयाँसम्म निक्षेप थपिन थालेपछि बढेको तरलता व्यवस्थापन गर्न राष्ट्र बैंकलाई चुनौती थपिएको छ । नेपाल राष्ट्र बैंकका सहायक प्रवक्ता नारायाण प्रसाद पोखरेलका अनुसार सोमबारसम्म बैंकिङ्ग प्रणालीमा ८८ अर्ब ५४ करोड रुपैयाँ अधिक तरलता छ । तरलता बढेपछि त्यसलाई तान्न राष्ट्र बैंकले चालु आर्थिक वर्षमा पाँचौं पटक रिभर्स रिपो जारी गरेको हो ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।