बैंकहरुको उठ्न बाँकी ब्याज साढे ९ अर्ब, ग्लोबल आइएमईको मात्रै १ अर्ब ३६ करोड

वाणिज्य बैंकहरुले आम्दानीमा देखाएको तर उठिनसकेको ब्याजको आकार झनै बढ्दै गएको छ । आर्थिक गतिविधिमा आएको सुस्तताका कारण ऋणीले समयमा व्याज भुक्तानी नगरे पनि बैंकहरुको उठ्न बाँकी रहेको ब्याज भने बढेर साढे ९ अर्ब पुगेको हो ।

कोरोना माहामारी तथा आर्थिक मन्दीका कारण बैंकहरुका ऋणीको नगद प्रवाह प्रभावित भयो । ऋणीको नगद प्रवाह प्रभावित भएपछि अघिल्लो आर्थिक वर्षको तुलनामा गत आवमा उठ्न बाँकी ब्याज रकम शतप्रतिशतभन्दा धेरैले बढेको हो ।

गत आर्थिक वर्षमा सञ्चालनमा रहेका १९ वाणिज्य बैंकहरुको उठ्न बाँकी ब्याज ९ अर्ब ४६ करोड ५० लाख रुपैयाँ बराबर छ । यो रकम अघिल्लो आर्थिक वर्षको तुलनामा ११५.९७ प्रतिशतले धेरै हो । अघिल्लो आवमा बैंकहरुको उठ्न बाँकी ब्याज ४ अर्ब ३८ करोड २४ लाख रुपैयाँ रहेको थियो ।

नेपाल वित्तीय प्रतिवेदन मान (एनएफआरएस) मा बैंकहरुले उठिनसकेको ब्याजदलाई पनि आम्दानीमा देखाउन पाउने व्यवस्था छ । सोही अनुसार वित्तीय विवरण तयार गरेको हुनाले बैंकहरुले उठिनसकेको ब्याजलाई पनि आम्दानीमा देखाएका हुन् । यसरी उठ्न बाँकी रहेको ब्याजलाई आम्दानीमा देखाउँदा नाफा बढेको देखिने भएपनि वितरणयोग्य नाफा भने घट्न जान्छ ।

गत आर्थिक वर्षमा बैंकहरुले उठ्न बाँकी रहेको ब्याजलाई आम्दानी देखाउँदा खुद नाफा ६५ अर्ब २५ करोड रुपैयाँ (राष्ट्रिय वाणिज्य बैंकको ४ अर्ब ९१ करोड ७२ लाख रुपैयाँ बाहेक) रुपैयाँ रहेको छ । राष्ट्रिय वणिज्य बैंकले गत आवको वित्तीय विवरणमा उठ्न बाँकी ब्याज उल्लेख गरेको छैन । तर, बैंकहरुले रियलाइज्ड गरेको आम्दानीका आधारमा बैंकहरुको खुद नाफा ५५ अर्ब ७९ लाख रुपैयाँ मात्र हुन आउँछ । बैंकहरुले उठ्न बाँकी रहेको ब्याजलाई आम्दानीमा देखाएको भएपनि वितरणयोग्य नाफामा त्यसलाई घटाउने गरेका छन् । यसले गर्दा नाफा धेरै देखिए पनि लाभांश वितरणको क्षमतामा भने कमी आउँछ ।

कोरोना तथा आर्थिक मन्त्रीका कारण बैंकहरुको कर्जा डिफल्ट रेट बढेको छ । त्यसैगरी खराब कर्जाका अंश, जोखिम व्यवस्था, लोन राइट अफ समेत उल्लेख्य बढेको छ । अघिल्लो आर्थिक वर्षमा अधिक कर्जा लगानी गरेका बैंकहरु त्यसपछि कर्जा लगानी बढाउन सकेका छैनन भने सो समयमा दिएको कर्जा असुलीमा समेत समस्या देखिएपछि बैंकहरुका केही सूचकहरु प्रभावित भएका हुन् ।

गत आर्थिक वर्षमा सबैभन्दा धेरै उठ्न बाँकी ब्याज ग्लोबल आइएमई बैंकको रहेको छ । सो अवधिमा बैंकको १ अर्ब ३६ करोड २१ लाख रुपैयाँ ब्याज उठेको छैन । बैंकले यसलाई आम्दानीमा देखाउदा नाफा पनि ७ अर्ब २५ करोड रुपैयाँभन्दा माथि देखिएको छ । ग्लोबल आइएमइ बैंकको उठ्न बाँकी ब्याज रकम कुल रकमको १४ प्रतिशत बराबर हो । अघिल्लो आवमा बैंकको उठ्न बाँकी ब्याज १४ करोड २६ लाख रुपैयाँ मात्र थियो ।

त्यसैगरी साढे ७ अर्ब खुद नाफा गरेको नबिल बैंकको ९९ करोड ९६ लाख ३० हजार रुपैयाँ बराबरको ब्याज उठ्न बाँकी रहेको छ । बैंकको गत आवमा यस्तो रकम ४९ करोड २३ लाख रुपैयाँ बराबरको मात्र थियो । गत आवमा हिमालयन बैंकको ९७ करोड, एनआइसी एशिया बैंकको ८४ करोड, प्राइम कमर्सियल बैंकको ९२ करोड रुपैयाँ ब्याज उठ्न बाँकी छ । कुमारी बैंकको गत आवमा उठ्न बाँकी ब्याज सबैभन्दा थोरै ६ करोड ५ लाख मात्र रहेको छ । अघिल्लो आवमा ५१ लाख रुपैयाँ बराबरको ब्याज उठ्न बाँकी रहेको एभेष्ट बैंकको गत आवमा बढेर १६ करोड २१ लाख रुपैयाँ पुगेको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।