सरकारी ऋणपत्रमा बैंक तथा वित्तीय संस्थाको ९४ प्रतिशत हिस्सा, ३९ अर्ब ब्याज मात्रै भुक्तानी

सरकारले राजस्व तथा विदेशी सहायताबाट अपुग स्रोत संकलनका लागि उठाउने आन्तिरक ऋणपत्रको अधिकासं हिस्सा बैंक तथा वित्तीय सस्थाको रहेको छ । सरकारले जारी गर्ने ट्रेजरी बिल्स तथा डेभलपमेन्ट बण्डमा बैंक तथा वित्तीय संस्थाको ९४.६१ प्रतिशत लगानी देखिएको हो ।

चालु आर्थिक वर्षको माघ मसान्तसम्ममा सरकारको आन्तरीक ऋण ११ अर्ब ८४ करोड रुपैयाँ बराबरको रहेको छ । सो मध्ये ट्रेजरी बिल्स ४ खर्ब ६ अर्ब १५ करोड रुपैयाँ बरावरको छ भने विकास ऋणपत्र ७ खर्ब ६७ अर्ब बरावरको छ । त्यसैगरी नागरिक बचत पत्र १० अर्ब ७५ करोड र बैदेहिक रोजगार बचतपत्र १७ करोड ५४ लाख रुपैयाँ बराबरकोे रहेको केन्द्रीय बैंकले जनाएको छ ।

सरकारले आन्तरिक ऋणका लागि जारी गर्ने उपकरण मध्ये बैंक तथा वित्तीय संस्थाले खरिद गर्ने ट्रेजरी बिल्स र विकास ऋणपत्र मात्र हो । माघसम्म सरकारको ट्रेजरी बिल्स तर्फको दायित्व ४ खर्ब ६ अर्ब १५ करोड मध्ये बैंक तथा वित्तीय संस्थालाई मात्रै ३ खर्ब ८६ अर्ब भुक्तानी गर्नु पर्ने देखिन्छ । त्यसमा पनि बाणिज्य बैंकहरुलाई ३ खर्ब ६६ अर्ब, विकास बैंकहरुलाई १५ अर्ब १५ करोड र फाइनान्स कम्पनीलाई ४ अर्ब ६० करोड रुपैयाँ दायीत्व भुक्तानी गर्नु पर्ने अवस्था छ ।

त्यसैगरी विकास ऋणपत्रमा पनि बैंक तथा वित्तीय संस्थाको मात्रै कुल ७ खर्ब ३३ अर्ब बरावरको लगानी रहेको छ । विकास ऋणपत्रमा वाणिज्य बैंकहरुको ६ खर्ब ३३ अर्ब, विकास बैंकहरुको ८१ अर्ब ५५ करोड र फाइनान्स कम्पनीहरुको १८ अर्ब २४ करोड रुपैयाँ बरावरको लगानी रहेको छ ।

चालु आवको माघसम्ममा लघुवित्त वित्तीय संस्थाले ट्रेजरी बिल्समा ७५ करोड र विकास ऋणपत्रमा १९ करोड रुपैयाँ बरावरको लगानी गरेका छन् । त्यसैगरी समाजिक सुरक्षा कोषले ट्रेजरीमा ६ अर्ब ४१ करोड र विकास ऋणपत्रमा एक अर्ब ९८ करोड रुपैयाँ लगानी गरेको छ । सो अवधिमा बीमा कम्पनीहरुले ट्रेजरीमा एक अर्ब ४५ करोड र विकास ऋणपत्रमा ३ अर्ब ४२ करोड रुपैयाँ बराबरको लगानी गरेको केन्द्रीय बैंकले जनाएको छ । अन्य संस्थाहरुले ट्रेजरीमा ६ अर्ब ५३ करोड र विकास ऋणपत्रमा ३ अर्ब ५ करोड लगानी गरेका छन् ।

केन्द्रीय बैंकले ४ अर्ब ७३ करोड ट्रेजरीमा र २४ अर्ब ९२ करोड विकास ऋणपत्रमा लगानी गरेको छ । त्यसैगरी नागरीक बचतपत्रमा ३ अर्ब ९० करोड र बैदेशिक रोजगार बचतपत्रमा ६५ लाख रुपैयाँ लगानी गरेको केन्द्रीय बैंकले जनाएको छ ।

चालु आर्थिक वर्षमा सरकारले ३ खर्ब ९० अर्बको आन्तरिक ऋणपत्र भुक्तानी गरेको छ । सरकारले भुक्तानी गरेको रकम कुल आन्तरिक ऋणको ३२.९८ प्रतिशत हो । सरकारले आगामी आर्थिक वर्षमा अहिलेको आन्तरिक ऋणको एक खर्ब ७० अर्ब रुपैयाँ भुक्तानी गर्नु पर्ने केन्द्रीय बैंकले जनाएको छ ।

चालु आवको पुससम्ममा सरकारले आन्तरिक ऋणको ३८ अर्ब ९० करोड रुपैयाँ ब्याज भुक्तानी गरेको छ । सो अवधिमा सरकारले आन्तरिक ऋणको साँवा भने ९१ अर्ब १६ करोड रुपैयाँ भूक्तानी गरेको केन्द्रीय बैंकले जनाएको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ।