दश महिनामा ४१ अर्ब वैदेशिक लगानी प्रतिवद्धता प्राप्त, वैशाखमा मात्रै सवा ११ अर्ब

चालु आर्थिक वर्षको १० महिनामा ४१ अर्ब बढीको वैदेशिक लगानी स्वीकृत भएको छ। उद्योग विभागका अनुसार गत साउनदेखि वैशाख मसान्तसम्ममा कुल ४१ अर्ब २ करोड बढी वैदेशिक लगानी स्वीकृत भएको हो ।

उद्योग विभागका अनुसार वैशाख मसान्तसम्म ४१ अर्ब २ करोड २ लाख २६ हजार रुपैयाँ बराबर एफडीआई स्वीकृत भएको छ । यो अघिल्लो आव २०७९/८० को सोही अवधिको तुलनामा सवा ११ अर्ब बढी हो । गत आव वैशाख मसान्तसम्म २९ अर्ब ७४ करोड रुपैयाँ बराबर एफडीआई आएको थियो ।

चालु आर्थिक १० महिनाको अवधिमा विभिन्न देशबाट ३०७ वटा नयाँ उद्योगका सो लगानी प्रतिवद्धता आएको हो । विभागका अनुसार वैशाखसम्म ४ वटा ठूला, १३ वटा मध्यम र २९० वटा साना उद्योगको लागि वैदेशिक लगानी स्वीकृत भएको हो। यी उद्योगहरुबाट १७ हजार २२३ रोजगारी सृजना हुने विभागको भनाई छ ।

वैशाखमा मात्रै ३८ वटा उद्योगका लागि ११ अर्ब २८ करोड ५७ लाख बराबरको लगानी प्रतिबद्धता स्वीकृत गरिएको छ। जसबाट १७३४ जनाले रोजगारी पाउने विभागले जनाएको छ । वैशाखमा ३७ वटा साना उद्योग तथा एउटा ठूलो उद्योगको लागि लगानी प्रतिवद्धता प्राप्त भएको हो ।

विभागको तथ्यांक अनुसार चालु आर्थिक वर्षको साउनदेखि वैशाखसम्म महिनागत रूपमा वैशाखमा चालु वर्षकै सबैभन्दा धेरै लगानी स्वीकृत भएको हो । सरकारले वैशाख १६ र १७ गते नेपालमा लगानी सम्मेलन गरेको थियो। त्यसको प्रभाव लगानी प्रतिवद्धतामा देखिएको छ।

दश महिनामा स्वीकृत औद्योगिक परियोजना मध्येमा पर्यटन क्षेत्रका ४७ प्रतिशत, ३४ प्रतिशत सेवा क्षेत्र, ११ प्रतिशत उत्पादन क्षेत्र, ३ प्रतिशत सूचना तथा प्रविधि, २ प्रतिशत परियोजना कृषि क्षेत्रमा आधारित रहेका छन्।

वैशाखसम्म आएको एफडीआईको ठूलो हिस्सा पर्यटनमा केन्द्रित देखिन्छ । कुल लगानी प्रतिवद्धतामध्ये सबैभन्दा धेरै पर्यटन उद्योगमा आएको छ। यस क्षेत्रमा १४४ उद्योगको लगानी स्वीकृत भएको छ। सेवा क्षेत्रमा १०३, उत्पादनमूलक उद्योगमा ३४, सूचना प्रविधिमा नौ, पूर्वाधारमा ७, कृषिमा ७ र खानीमा दुई वटा उद्योगको लगानी स्वीकृत भएको विभागले जनाएको छ।

यता, वैशाखबाटै कार्यान्वयनमा आएको अटोमेटिक रुट अर्थात स्वालित प्रणालीमार्फत एकै महिनामा २ अर्ब १५ करोड रुपैयाँ बराबरको लगानी स्वीकृत भएको छ यस प्रणालीमार्फत कूल २१ परियोजना स्वीकृत भएका थिए ।

विभागका अनुसार हालसम्म ६ हजार १६६ उद्योगहरुका लागि ४ खर्ब ७९ अर्ब ९४ करोड बराबरकोे लगानी प्रतिबद्धता आएको जनाइएको छ । ती उद्योगहरुबाट ३ लाख २७ हजार ३ सय ३२ जनाले रोजगारी पाउने विभागको भनाई छ ।

वैशाखसम्म झन्डै २ हजार विदेशी नागरिकले नेपालमा लगानीकर्ताका रूपमा बिजनेस भिसा पाएका छन् । तथ्यांक अनुसार वैशाखसम्म १ हजार ८ सय ९६ लगानीकर्ताले बिजनेस भिसा पाएका छन् ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।