जनसेवीलाई भित्र्याएपछि कालिका लघुवित्त सञ्चालन नोक्सानीमा, कति कमायो खुद नाफा ?

जनसेवी लघुवित्तसँग मर्जर पुरा गरे पछि कालिका लघुवित्तको वित्तीय विबरणहरुमा सन्तुलन गुमेको छ । कुनै समयमा कालिका माइक्रोक्रेडिट भन्दै उत्साहित हुनेहरुका लागि अहिले लघुवित्तले झिनो आश गर्ने अवस्था पनि देखाउन सकेन । मर्जरका कारण कर्मचारी खर्च बढेका कारण लघुवित्त सञ्चालन नोक्सानीको अवस्थामा पुगेको छ ।

गत आर्थिक वर्षको चौथो त्रैमासमा कालिकाले ४८ लाख ६९ हजार रुपैयाँ मात्र खुद नाफा कमाएको छ । जबकी जनसेवीसँग मर्जर हुनु पहिले अघिल्लो आर्थिक वर्षको यसै अवधिमा कालिकाले २ करोड ७ लाख ५२ हजार रुपैयाँ खुद नाफा कमाएको थियो । समीक्षा अवधिमा कालिकाको खुद नाफा ७६.५३ प्रतिशतले घटेको हो ।

समीक्षा अवधिमा कालिको चुक्ता पूँजी १० करोड ८ लाख रुपैयाँबाट बढेर २५ करोड २३ लाख ३० हजार रुपैयाँ पुगेको छ । यसरी चुक्ता पूँजी १५० प्रतिशतले वृद्धि हुँदै गर्दा खुद नाफा ७६ प्रतिशतले घटेपछि कालिकाका शेयरधनी निराश बन्ने देखिएको छ ।

पूँजी वृद्धि र आम्दानी उल्टो बाटोमा लागेका कारण लघुवित्तको प्रतिशेयर आम्दानीमा भारी गिरावट आएको छ । अघिल्लो आर्थिक वर्षको असार मसान्तमा १९.२१ रुपैयाँ रहेको कालिकाको प्रतिशेयर आम्दानी गत आर्थिक वर्षको असार मसान्तमा ७.८२रुपैयाँ सीमित भएको छ ।

दुई लघुवित्तका बीचमा भएको मर्जरपछि लघुवित्तको समग्र वित्तीय सूचकहरुमा बढोत्तरी देखिए पनि कर्मचारी खर्च बढेपछि कालिका सञ्चालन नोक्सानीमा गएको छ ।

निक्षेप संकलन, कर्जा परिचालन लगायतका सूचकमा सामान्य बढोत्तरी हुँदा कालिको व्याज आम्दानी पनि सुधार भएको देखिन्छ । यद्यपी कर्मचारी खर्चमा आएको बढोत्तरीसँगै सम्भावित जोखिम वापत गरिने व्यवस्थामा रकम बढेपछि लघुवित्त सञ्चालन नोक्सानीको अवस्थामा पुगेको हो ।

अघिल्लो आर्थिक वर्षको यसै अवधिमा १ करोड १८ लाख रुपैयाँ सञ्चालन नाफा कमाएको कालिका अहिले २ करोड ९३ लाख रुपैयाँ सञ्चालन नोक्सानीको अवस्थामा छ ।

सम्भावित जोखिम वापतको व्यवस्थाबाट फिर्ता भएको ३ करोड ७० लाख रुपैयाँले मात्र लघुवित्तले खुद नाफा धनात्मक बनाउन सकेको हो ।

समीक्षा अवधिमा निष्कृय कर्जा अनुपात १.६ प्रतिशतबाट २.९८ प्रतिशतमा उक्लिएको कालिकाको मूल्य आम्दानी अनुपात १०५.५ गूणा बढी छ । समीक्षा अवधिमा ६ करोड ७७ लाख रुपैयाँको जगेडा कोषलाई १४ करोड ६९ लाख रुपैयाँ पुर्याएको लघुवित्तको प्रतिशेयर नेटवर्थ १४५.६१ रुपैयाँ छ ।

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।