नागबेली लघुवित्तले सार्वजनिक गरेको अन्तिम वित्तीय विवरणमा देखियो यस्तो सुधार

मिर्मिरे लघुवित्तमा विलय प्रकृयामा रहेको नागबेली लघुवित्तले अन्तिम वित्तीय विवरण सार्वजनिक गरेको छ । केन्द्रीय बैंकले दुवै लघुवित्तलाई विलय पूरा गर्न अन्तिम स्वीकृति दिएको अवस्थामा नागबेलीले सुधारिएको वित्तीय विबरण पस्किएको हो ।

नागबेलीले गत आर्थिक वर्ष २०७६/०७७ मा ३ करोड ९६ लाख रुपैयाँ खुद नाफा कमाएको छ । अघिल्लो आर्थिक वर्ष २०७५/०७६ मा नागबेलीले ३५ करोड ५२ लाख रुपैयाँ खुद नाफा कमाएको थियो । लघुवित्तको प्रतिशेयर आम्दानी १८ रुपैयाँ ७७ पैसा छ ।

समीक्षा अवधिमा १६ करोड ७६ लाख ७९ हजार रुपैयाँको चुक्ता पूँजीलाई २१ करोड १२ लाख ७६ हजार रुपैयाँ पुर्याएको लघुवित्तको जगेडा कोष भने १२ करोड ७ लाखबाट ११ करोड २२ लाख रुपैयाँमा झरेको छ । लघुवित्तको प्रतिशेयर नेटवर्थ १५३ रुपैयाँ १२ पैसा छ ।

समीक्षा अवधिमा निक्षेप संकलन तथा कर्जा परिचालनमा फराकिलो अंकको वृद्धि गरेको लघुवित्तको खुद व्याज आम्दानी ९ करोड २२ लाख रुपैयाँबाट १२ करोड ५७ लाख रुपैयाँमा उक्लिएको छ ।

२०७६ फागुन १४ गते मिर्मिरे लघुवित्तले नागबेलीलाई १०० बराबर ९५ कित्ता शेयर आदानप्रदान अुपातमा विलय गर्ने सम्झौता भए पछि नागबेलीको शेयर कारोबार रोक्का छ । गत साता मात्र राष्ट्र बैंकले दुवै संस्थालाई विलय प्रकृया पूरा गरी एकीकृत कारोबार गर्न अन्तिम स्वीकृति दिएको थियो ।

मिर्मिरे लघुवित्तले नागबेलीलाई विलय गरेपछि कायम हुने चुक्ता पूँजी ४० करोड रुपैयाँको ५० प्रतिशतले हुने २० करोड रुपैयाँ बराबरको हकप्रद शेयर निष्काशन गर्ने प्रस्ताव साधारण सभाबाट पारित गरिसकेको छ । पछिल्ले समय नेपाल राष्ट्र बैंकले बैंक तथा वित्तीय संस्थाको हकप्रदलाई कडाई गरिरहेका बेला मिर्मिरेको हकप्रदलाई स्वीकृत गर्छ कि गर्दैन भन्ने अन्यौलता छ ।

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।