बुटवल पावरले मुद्दती निक्षेपलाई आयोजना निर्माणमा लगानी गरेपछि घट्यो खुद नाफा

जलविद्युत आयोजनामा लगानी बढाए पछि बुटवल पावर कम्पनीको खुद नाफा प्रभावित भएको छ । विद्युत बिक्रीबाट हुने आम्दानी लगायतका सूचकहरु सुधार भएको अवस्थामा कम्पनीको मुद्दती निक्षेपको व्याजबाट हुने आम्दानी घटेपछि नाफा पनि घटेको हो ।

कम्पनीले गत आर्थिक वर्ष २०७६/७७ को चौथो त्रैमाससम्ममा ७५ करोड ७१ लाख ९९ हजार रुपैयाँ खुद नाफा कमाएको छ ।

अघिल्लो आर्थिक वर्षको यसै अवधिमा कम्पनीले ७९ करोड ४ लाख २९ हजार रुपैयाँ खुद नाफा कमाएको थियो । समीक्षा अवधिमा कम्पनीको खुद नाफामा ४.९२ प्रतिशतको गिरावट आएको हो ।

खुद नाफामा आएको गिरावटसँगै चुक्ता पूँजी वृद्धि भएकाले कम्पनीको प्रतिशेयर आम्दानीमा पनि गिरावट आएको छ ।

अघिल्लो आर्थिक वर्षको असार मसान्तमा ३१ रुपैंया १५ पैसा रहेको प्रतिशेयर आम्दानी गत आर्थिक वर्षको सोही अवधिमा २९ रुपैयाँ ९४ पैसा कायम भएको छ ।

कम्पनीले जलविद्युत बिक्रीबाट गत असार मसान्तसम्ममा ६८ करोड ६७ लाख ७ हजार रुपैयाँ आम्दानी गरेको छ । अघिल्लो आर्थिक वर्षको यसै अवधिमा कम्पनीले ६८ करोड ३० लाख ७८ हजार रुपैयाँ को विद्युत बिक्री गरेको थियो ।

विद्युत उत्पादन तथा बिक्री खर्चमा गिरावट आउँदा कम्पनीको कुल आम्दानी २७ करोड ९७ लाख २१ हजार रुपैयाँबाट ३३ करोड ५८ लाख ७८ हजार रुपैंया पुगेको छ ।

प्रशासनिक तथा अन्य खर्चसँगै जलविद्युत आयोजनामा लगानी बढेसँगै जोखिम वापतको व्यवस्थामा ठूलो रकम खर्चिएको छ । कम्पनीले काबेली इनर्जी र गुराँस इनर्जीमा लगानी बढाउँदा २४ करोड ४३ लाख २ हजार रुपैयाँ जोखिम व्यवस्थापनमा खर्चिएको छ । अघिल्लो आर्थिक वर्षमो यो शीर्षकमा १८ लाख ३० हजार रुपैयाँ मात्र खर्च भएको थियो ।

अघिल्लो आर्थिक वर्षमा कम्पनी मुद्दती निक्षेपबाट १५ करोड १५ लाख ४० हजार रुपैयाँ आम्दानी गरेकोमा गत आर्थिक वर्षको यसै अवधिमा २ करोड ४२ लाख ५४ हजार रुपैयाँ मात्र आम्दानी गरेको छ । अन्य जलविद्युत आयोजनामा मुद्दती निक्षेपमा राखेको रकम लगानी गरेका कारण वित्तीय आम्दानीमा संकुचन देखिएको हो ।

यसरी जोखिम व्यवस्थापनमा बढेको खर्च र अरु आयोजनामा लगानी बढाएका कारण कम्पनीको सञ्चालन नोक्सानीसँगै खुद नाफामा सामान्य गिरावट आएको हो ।

समीक्षा अवधिमा २ अर्ब ४४ करोड ५ लाख ५५ हजार रुपैयाँको चुक्ता पूँजीलाई २ अर्ब ६८ करोड ३८ लाख ८२ हजार रुपैयाँ पुर्याएको कम्पनीको जगेडा कोष भने ४ अर्ब ४६ करोड ७ लाख २६ हजार रुपैयाँबाट ४ अर्ब ५३ करोड ४५ लाख ६९ हजारमा उक्लिएको छ ।

अघिल्लो आर्थिक वर्षको चौथो त्रैमासमा २८२ रुपैयाँ७८ पैसा रहेको प्रतिशेयर नेटवर्थ गत आर्थिक वर्षको सोही अवधिमा २६८ रुपैयाँ ९६ पैसामा झरेको छ । अघिल्लो आर्थिक वर्षको चौथो त्रैमासमा १३.१३ गुणा बढी रहेको मूल्य आम्दानी अनुपात गत आर्थिक वर्षको सोही अवधिमा १३.३३ गुणा बढी कायम भएको छ ।

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।