‘प्रोफिट बुकिङ्ग’ले शेयर बजारमा करेक्शन, फाइनान्स र विकास बैंक लगानीकर्ताको रोजाईमा

साताको दोस्रो दिन सोमबार शेयर बजारका लगानीकर्ताले नाफा सुरक्षित गर्दा नेप्सेमा सामान्य करेक्शन आएको छ । पछिल्ला तीन कारोबार दिनमा १९ अंकले बढेको बजारमा अल्पकालीन लगानीकर्ताले नाफा आएका स्क्रिप्ट बेचेर बाहिरिएपछि बजार ४.७३ अंकले घटेर बन्द भएको छ ।

आजको बजारमा पनि विशेषगरी सस्ता मूल्य भएका फाइनान्स कम्पनीहरु र विकास बैंकको शेयर मूल्य बढेको छ । लगानीकताृको रोजाइमा परेको दुबै उपसमूहका सूचक सकारात्मक बन्दै शेयरमूल्य बढ्ने कम्पनीमा पनि फाइनान्स कम्पनीहरु अग्र स्थानमा देखिएका छन् ।

पछिल्ला दिनमा सस्ता कम्पनीहरुको शेयरमा लगानीकर्ताको आकर्षण रहेकोमा नाफा आएपछि शेयर बिक्री गरी धमाधम बाहिरिन थालेपछि बजारमा करेक्शन आएको हो । ठूला कम्पनीहरुमा प्रफिट बुकिंङ गरिसकेका लगानीकर्ताहरु ठूला कम्पनीहरुको शेयर बिक्री गरेर साना तथा मझौला कम्पनीमा केन्द्रित भएका छन् ।

आज नेप्से ४.७३ अंकले घटेर १ हजार ५६० दशमलव ८३ अंकमा बन्द भएको छ । नेप्सेमा करेक्शन आएसँगै कारोबार रकम समेत ह्वात्तै घटेको छ । सोमबार नेपाल स्टक एक्सचेञ्जमा १९१ कम्पनीका ६९ लाख ९७ हजार ४२० कित्ता शेयर ३० हजार ५९६ पटक किनबेच हुँदा १ अर्ब ६९ करोड १ लाख रुपैयाँ बराबरको कारोबार भएको हो ।

अघिल्लो दिन आइतबारको तुलनामा कारोबार रकम १ अर्ब ४४ करोड ८१ लाख रुपैयाँले घटेको हो । आइतबार १९१ कम्पनीका एक करोड ९९ लाख ७२ हजार ३११ कित्ता शेयर ४२ हजार १०८ पटक किनबेच हुँदा ३ अर्ब १३ करोड ८२ लाखरुपैयाँ बराबरको कारोबार भएको थियो ।

वित्त र विकास बैंक बाहेक सबै उपसमूहका सूचक ऋणात्मक

सोमबार कारोबारमा आएका १२ उपसमूहका सूचकमध्ये वित्त र विकास बैंक बाहेक सबै उपसमूहका सूचक ऋणात्मक बनेका छन् । लगानीकर्ताको आकर्षण विस्तारै फाइनान्स र विकास बैंकको शेयरतर्फ मोडिएको छ । जसले सोमबार शीर्ष शेयरमूल्य बढ्ने दश कम्पनीमा पाँच कम्पनी वित्तका रहेका छन् ।

आज ब्यापार र होटल सूचक १ प्रतिशत धेरैले घटेको छ । बाँकी ८ उपसमूहका सूचक १ प्रतिशतभन्दा कमले ऋणात्मक बनेको छ ।

दोलखा हाइड्रोपावरको उच्च कारोबार

सोमबारको बजारमा पनि हिमाल दोलखा हाइड्रोपावरको दोस्रो दिन पनि उच्च रकमको शेयर किनबेच भएको छ । कम्पनीको ८ लाख ६९ हजार ६०३ कित्ता शेयर ९ करोड ३२ लाख ६३ हजार रुपैयाँ बराबरको शेयर खरीद बिक्री भयो । आइतबार पनि बल्क ट्रेडिङ्ग भएको सोल्टीलाई छाड्ने हो भने कम्पनीको सबैभन्दा धेरै १४ करोड बढीको शेयर कारोबार भएको थियो ।

यसैगरी सोमबार नेपाल रि इन्स्योरेन्स कम्पनीको ६ करोड ४० लाख, अरुण भ्याली हाइड्रोपावर ५ करोड ९५ लाख, र प्रभु बैंकको ५ करोड २७ लाख बढीको शेयर खरीद बिक्री भएको छ  । नेपाल लाइफ इन्स्योरेन्स, कुमारी बैंक, सिभिल बैंक, नेपाल बैंक, अपि पावर, र चिलिमे हाइड्रोपावरको शीर्ष कारोबार भएको छ । दशौं ठूलो कारोबार भएको चिलिमेको ३ करोड ७८ लाखको शेयर कारोबार भयो ।

नेपाल फाइनान्सको हकप्रद प्रस्तावले उचाल्यो शेयरमूल्य

आज पनि नेपाल फाइनान्सको शेयरमुल्य उच्च बढेको छ । एकैपटक आठ आर्थिक वर्षको साधारण सभा सम्पन्न गर्दै  १७५ प्रतिशत हकप्रद जारी गर्ने प्रस्ताव साधारण सभाबाट अनुमोदन गराएपछि फाइनान्सको शेयरमूल्य बढ्ने क्रम जारी छ ।

आइतबार र सोमबार कम्पनीको शेयरमूल्य सर्किट लेबलमा बढेको छ । दुई दिनमा नै कम्पनीको शेयरमूल्य ४० रुपैयाँले बढेर २३९ रुपैयाँ पुगेको हो ।

यसैगरी आजको बजारमा सेन्ट्रल फाइनान्सको ८.११, रिलायन्स फाइनान्सको ७.६४, सर्पोट माइक्रोफाइनान्सको ७.११, प्रोगेशिभ फाइनान्सको ४.३१, कामना सेवा विकास बैंकको ३.८५, युनाइडेड फाइनान्स ३.६१,  अरुण भ्याली  र रैराङ्ग हाइड्रोपावर ३.११ प्रतिशत तथा अपि पावरको २.७० प्रतिशतले शेयरमूल्य बढेको छ ।

पाँचथर पावर कम्पनीको घट्यो

सोमबारको बजारबाट पाँचथर पावर कम्पनीको शेयरमा लगानी गरेकाले सबैभन्दा धेरै ५.१७ प्रतिशतले शेयरमूल्य घटेको छ । गुहेश्वरी फाइनान्स र दीब्यश्वरी हाइड्रोपावरको शेयरमूल्य ४ प्रतिशत धेरैले घट्दा आखुँखोला हाइड्रोपावर, सानिमा इक्वीटी फण्डको इकाई, ङादी ग्रुप पावर र लिवर्टी इनजीको शेयरका लगानीकर्ताले पनि ३ प्रतिशत धेरैले गुमाएका छन् ।

जोशी हाइड्रोपावर, घलेम्दी हाइड्रोपावर र स्वाभिमान लघुवित्तका शेयरमूल्य पनि घटेको छ ।

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।