शेयर बजारबाट लगानी झिक्दा नेप्से दोहोरो अंकले घट्यो

शेयर बजारका लगानीकर्ताहरुले नजिकिँदो दशैंलाई शेयर बजारमा गरेको लगानी झिक्दा मंगलबार शेयर बजार परिसूचक मापक नेप्से दोहोरो अंकले घट्न पुगेको छ ।

असोज मसान्त नजिकिँदा ठूला कारोबारीहरु कर र ऋणको ब्याज भुक्तानीमा केन्द्रीत रहँदा उनीहरुले पनि बजारमा लगानी बढाएका छैनन्। साना लगानीकर्ताहरुले पनि आफ्ना भएको लगानीकमध्ये दशैं खर्च जोहो गर्नतर्फ लाग्दा सूचक दबाबमा परेको हो ।

मंगलबार नेप्से ०.६० प्रतिशत अर्थात ९.४२ अंकले घटेर १ हजार ५६८ दशमलव ५९ बिन्दुमा बन्द हुन पुगेको छ । यस्तै सेन्सेटिभ परिसूचक १.७० अंकले घटेर ३११.४१ बिन्दुमा झरेको छ ।

नेपाल स्टक एक्सचेञ्जका अनुसार कूल १९३ वटा कम्पनीको ६७ लाख ८२ हजार ९४७ कित्ता शेयर २८ हजार ६४० पटक खरिद िबक्री हुँदा १ अर्ब ८१ करोड ९६ लाख रुपैयाँको कारोबार भएको छ । अघिल्लो दिन सोमबारको तुलनामा कारोबार रकम १२ करोड ९४ लाख रुपैयाँले घटेको हो ।

आज कारोबार भएका कूल १२ उपसमूहमध्ये म्युचुअल फण्ड, उत्पादन र ब्यापारको सूचक सकारात्मक बनेको छ भने बाँकी ९ वटा उपसमूहको सूचक घटेको छ। आज जलविद्युत २.०४ र वित्तको सूचक १.९२ प्रतिशतले घट्दा बाँकी १ प्रतिशतभन्दा कमले घटेका छन् ।

• अरुण काबेली पावरको सर्वाधिक कारोबार

मंगलबार अरुण काबेली पावरको सर्वाधिक कारोबार भएको छ । कम्पनीको ११ करोड २६ लाख २१ हजार रुपैयाँको शेयर खरीद बिक्री भएको हो । ज्योति विकास बैंकको पनि १० करोड बढीको शेयर काराबार भएको बजारमा मुक्तिनाथ विकास बैंक, नेपाल रि इन्स्योरेन्स कम्पनी, सानिमा माई, नेपाल बैंक, नेशनल हाइड्रोपावर, कामना सेवा विकास बैंक, आईसीएफसी फाइनान्स र एनएमबि बैंकको उच्च करोबार भएको छ ।

• ज्योति विकास बैंकको शेयरमूल्य धेरै बढ्यो

मंगलबारको बजारमा ज्योति विकास बैंकको शेयरमूल्य सबैभन्दा धेरै बढेको छ बैंकको शेयर ४.८३ प्रतिशतले बढेर २१७ रुपैयाँ पुगेको हो ।
लक्ष्मी उन्नति कोष, युनिलिभर नेपाल, एनआईबिएल प्रगति फण्डको इकाइमूल्य २ प्रतिशत धेरैले बढेको छ ।

• पञ्चकन्या माई हाइड्रोपावरका लगानीकर्ताले गुमाए

आज पञ्चकन्या माई हाइड्रोपावरको शेयरमा लगानी गरेका लगानीकर्ताले सबैभन्दा धेरै ८.७२ प्रतिशतले गुमाएका छन् । कम्पनीको शेयर १३ रुपैयाँ घटेर १३६ मा कायम छ।

दीब्यश्वरी, खानीखोला, र रिडी हाइड्रोको शेयरमूल्य ७ प्रतिशत बढीले घट्दा घलेम्दी हाइड्रोपावर, समृद्धि फाइनान्स, युनियन हाइड्रोपावरको शेयरमूल्यमा पनि ६ प्रतिशतको ह्रास आएको छ ।

छ्याङ्दी हाइड्रोपावर, युनिभर्सल पावर, युनाइटेड मोदी हाइड्रोपावरको शेयरमूल्य पनि ५ प्रतिशत धेरैले घटेको छ ।

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।