दशैंपछि भुक्तानी गर्दा हुने भएपछि लगानीकर्ताले शेयर खरीद गर्न थाले

दशैंका लागि खर्च जोहो गर्न शेयर बेचेका लगानीकर्ता अब भने शेयर खरीदतर्फ लागेका छन् । शेयर बजारमा कारोबारको भएको रकम कारोबारको तेस्रो दिनसम्ममा अर्थात टि प्लस थ्री मा राफसाफ गर्नुपर्ने व्यवस्था रहेको छ ।

यसअनुसार शुक्रबार देखि नै दशैंको विदा सुरु हुने भएकाले मंगलबार शेयर खरीद गरेका लगानीकर्ताले दशैं मानेर रकम तिर्दा हुने भएकाले पनि कारोबार रकम बढेको हो । अर्कोतर्फ अहिले लाभांश सिजन पनि रहेको छ । नेप्सेको टिकाउपूर्ण अवस्था र बैंकिङ्ग प्रणालीमा बचतको घट्दो ब्याजदरले अझै शेयर बजार बढ्ने लगानीकर्ताको अनुमान रहेको छ ।

बैंक ब्याजभन्दा सूचीकृत कम्पनीहरुले दिने लाभांश बढी हुने भएपछि बैंकिङ्ग क्षेत्रमा राख्ने गरिएको रकम समेत शेयर बजारमा आउने अनुमान छ । हालसम्म माछापुच्छ्रे, बैंक अफ काठमाण्डू, सानिमा, सिटिजन्स गरी ४ वाणिज्य बैंक सहित सूचीकृत र केही सूचीकृत नभएका गरी कूल ३७ कम्पनीले लाभांश घोषणा गरेका छन् ।

दशैंपछि अन्य कम्पनीहरुको पनि धमाधम लाभांश घोषणा हुने हुँदा लगानीकर्ताको लगानीको पहिलो रोजाइ हाल शेयर बजार रहेकाले पनि नेप्से केही अंकको करेक्शनपछि फेरि बढिरहेको अवस्था छ । यसले पनि लगानीकर्तालाई लगानी गर्ने मनोबलमा बढोत्तरी आएको छ ।

अघिल्लो साता र यस साताको पहिलो कारोबार दिन खर्च निकाल्ने क्रम बढ्दा नेप्सेमा सूचक दबाबमा रहेकोमा अब भने लगानीकर्ताहरु बजारमा लगानी बढाउन थालेका छन् । जसले अघिल्लो दिनको तुलनामा कारोबार रकम पनि ३० करोड रुपैयाँले बढेको छ ।

मंगलबार कारोबारमा आएका सबै उपसमूहको सूचक सकारात्मक तथा ६ वटा उपसमूहको सूचक १ प्रतिशत धेरैले उकालो लाग्दा नेप्से सूचकमा दोहोरो अंकको वृद्धि भएको छ । आज कारोबारमा आएका जलविद्युत उपसमूहको सबैभन्दा २.०२ प्रतिशतले बढेको छ भने विकास बैंक, वित्त, अन्य र म्युचुअल फण्डको सूचक पनि १ प्रतिशतले बढेको छ ।

आज नेप्से सूचक ०.८४ प्रतिशत अर्थात १३.२२ अंकले बढेर १ हजार ५८३ दशमलव ६० अंकमा बन्द भएको छ । आज १९३ कम्पनीका ५० लाख २५ हजार ४० कित्ता शेयर १८ हजार ८७० कित्ता शेयर खरीद बिक्री हुँदा १ अर्ब २७ करोड १८ लाख २९ हजारको कारोबार भएको छ ।

• चार कम्पनीको शेयरमूल्यमा सकारात्मक सर्किट

आज कारोबारमा आएका कम्पनीमध्ये जनरल इन्स्योरेन्स, माउन्टेन हाइड्रोपावर, हिमाल दोलखा र जोशी हाइड्रोपावरको शेयरमूल्य करिब १० प्रतिशतले बढेर साकारात्मक सर्किट लागेको छ ।

यसैगरी अपि पावर, घलेम्दी हाइड्रोपावर, कालिका पावर, आँखुखोला हाइड्रोपावर, छ्याङ्दी हाइड्रोपावर र ङादी हाइड्रोपावर आजको बजारमा शीर्ष शेयरमूल्य बढ्ने दश कम्पनीभित्र समेटिएका छन् । यी कम्पनीहरुको पनि ६ प्रतिशत धेरैले शेयरमूल्य बढेको छ ।

उता नेपाल फाइनान्स, रिलायन्स लाइफ, मुक्तिनाथ विकास बैंकको संस्थापक शेयरको साढे १ प्रतिशत बढीले घटेको छ ।

• अरुण काबेली पावरको उच्च कारोबार

मंगलबार अरुण काबेली पावरको उच्च कारोबार भएको छ । कम्पनीको ८ करोड ८२ लाख ९२ हजार रुपैयाँको शेयर खरीद बिक्री भएको हो ।

यस्तै अपि पावरको ७ करोड ६५ लाख, एचआईडिसीएलको ५ करोड ९९ लाख, नागरिक लगानी कोषको ३ करोड ९९ लाख, हिमाल दोलखा हाइड्रोपावरको ३ करोड ४३ लाख, शिखर इन्स्योरेन्सको २ करोड ७१ लाख, कुमारी बैंकको २ करोड ५९ लाख, एभरेष्ट बैंकको २ करोड ३४ लाख, नेशनल हाइड्रोपावरको २ करोड ३१ लाख र नेपाल रि इन्स्योरेन्सको २ करोड १४ लाख रुपैयाँको शेयर कारोबार भएको छ ।

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।