शेयर बजारमा चौंथो कारोबार दिन सुधार, पाँच कम्पनीको शेयरमूल्य ९% धेरै बढ्यो

शेयर बजारमा चौंथो कारोबार दिन नेप्से ५.४० अंकको सुधार आएको छ । लगातार तीन कारोबार दिन घटेको बजार मंगलबार ५.४० अंकले बढेर १ हजार ६४३ दशमलव ०४ अंकमा बजार बन्द भएको छ ।

आजको बजारमा ५० करोडभन्दा धेरै पूँजी भएका ठूला कम्पनीहरुको कारानेबार मापन गर्ने सूचक सेन्सिटिभ इन्डेक्स पनि १.१४ अंकले बढेर ३२६ दशमलव ६० अंकमा पुगेको छ ।

मंगलबारको बजारमा ५ कम्पनीको शेयरमूल्य ९ प्रतिशतभन्दा धेरैले बढेको छ भने कारोबारमा आएका १२ उपसमूहको परिसूचकमध्ये १० वटा बढेका छन् । विकास बैंक र बैंकिङ्ग इन्डेक्स भने घटेका छन् ।

मंगलबार कारोबारमा आएका कम्पनीमध्ये ८३ कम्पनीको शेयरमूल्य बढ्दा ७० कम्पनीको शेयरमूल्य घटेको छ । बाँकी १९ कम्पनीको शेयरमूल्य स्थिर रहेको छ ।

• ब्यापार सूचक सबैभन्दा धेरै बढ्यो, दश उपसमूहका सूचकमा वृद्धि

मंगलबार ब्यापार सूचक सबैभन्दा धेरै ४.८० प्रतिशतले बढेको छ भने म्युचुअल फन्ड समूहको २.४९ प्रतिशत, निर्जीवन बीमा समूहको परिसूचक २.१८ प्रतिशत र अन्यको परिसूचक १.३९ प्रतिशतले वृद्धि भएको छ । होटल, जलविद्युत, वित्त, उत्पादन, लघुवित्त र जीबन बीमाको सूचक १ प्रतिशत भन्दा थोरैले बढेका छन् । यता विकास बैंक समूहको परिसूचक ०.७६ प्रतिशत र बैंकिङ ०.१७ प्रतिशतले घटेको छ ।

मंगलबार १९८ कम्पनीको ७७ लाख ५७ हजार ३५३ कित्ता शेयर २९ हजार ६०६ पटक खरीद बिक्री हुँदा कारोबार रकम २ अर्ब २३ करोड ७९ लाख ६४ हजार रुपैयाँ पुगेको छ । सोमबारको तुलनामा मंगलबार कारोबार रकम २२ करोड रुपैयानँले घटेको हो ।

• नेपाल दुरसञ्चार कम्पनीको उच्च कारोबार

आज नेपाल दुरसञ्चार कम्पनी लिमिटेको सर्वाधिक कारोबार भएको छ । कम्पनीको १० करोड ३ लाख २१ हजार ५३२ रुपैयाँ बराबरको कारोबार भएको हो । यसैगरी एनआईसी एशिया बैंकको ८ करोड ३४ लाख, प्राइम कमर्सियल बैंकको ८ करोड ४ लाख, एचआईडिसीएलको ६ करोड ३७ लाख, शिवश्री हाइड्रोपावरको ५ करोड ९७ लाख, र डिप्रोक्स लघुवित्तको ५ करोड १० लाख रुपैयाँको कारोबार भएको छ ।

राष्ट्रिय बीमा कम्पनीको संस्थापक, अपि पावर, प्रभु बैंक र गुराँस लाइफ इन्स्योरेन्स शीर्ष कारोबार हुने दश कम्पनीमा समेटिएका छन् । दशौं ठूलो कारोबार भएको गुराँस लाइफको ४ करोड ७० लाखको कारोबार भएको छ ।

त्यस्तै कारोबार संख्याका आधारमा जनरल इन्स्यनेरेन्सको सर्वाधिक १ हजार ९ सय ४४ पटक कारोबार भएको छ । शेयर संख्याका आधारमा भने शिवश्री हाइड्रोपावरको ३ लाख ४६ हजार ६०८ कित्ता शेयर खरिद बिक्री भएको छ ।

• पाँच कम्पनीको शेयर मूल्य ९ प्रतिशत धेरै बढ्यो

मंगलबारको बजारमा ५ कम्पनीको शेयर मूल्य ९ प्रतिशत भन्दा धेरैले बढेको छ । विशाल बजार कम्पनी, समीट लघुवित्त, पाँचथर पावर, शिवश्री हाइड्रोपावर र राष्ट्रिय बीमा कम्पनीको संस्थापकको शेयरमूल्य ९ प्रतिशत धेरै बढेको हो ।

राष्ट्रिय बीमा कम्पनीको साधारण शेयर, एनआईसी एशिया ब्यालेन्स्ड् फण्ड, एनआईबिएल प्रगति फण्ड, लक्ष्मी इक्वीटी फण्ड, र नबील इक्वीटी फण्ड शीर्ष शेयरमूल्य बढ्ने दश कम्पनीभित्र समेटिएका छन् ।

उता आजको बजारमा महालक्ष्मी विकास बैंकका लगानीकर्ताले सर्वाधिक २.५५ प्रतिशतले गुमाएका छन् । दीब्यश्वरी हाइड्रोपावर, युनियन, जोशी, अरुण भ्याली, घलेम्दी हाइड्रोपावर, नेपाल सेवा लघुवित्त, सबैको लघुवित्त, गुराँस लाइफ र आँखुखोला जलविद्युत कम्पनी शीर्ष गुमाउने दश कम्पनीमा समेटिएको छ ।

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।