शेयर बजारमा छायो हरियाली, नेप्से २३.३२ अंकले बढ्दा ६ कम्पनीको शेयरमूल्यमा सकारात्मक सर्किट

तिहारपछिको पहिलो कारोबार दिनमा नै शेयर बजारमा हरियाली छाएको छ । नेप्से २३.३२ अंकले बढेको बुधबारको बजारमा ६ कम्पनीके शेयरमूल्यमा सकारात्मक सर्किट लागेको छ भने कारोबार रकम ४ अर्ब ८० करोड नजिक पुगेको छ ।

बजार खुलेको सुरुवाति १५ मिनेट दबाबमा रहेको नेप्से सूचकसँगै लगानीकर्ताको मनोबल उच्च हुँदा बजार इन्ट्रा डे हाइ बिन्दुमा बन्द भएको छ ।

बुधबारको बजारमा कूल १९४ वटा कम्पनीको १ करोड १६ लाख ७४ हजार ८७५ कित्ता शेयर ४३ हजार ६७३ पटक खरिद बिक्री हुँदा ४ अर्ब ७९ करोड १० लाख ४१ हजार ६४९ रुपैयाँ बराबरको कारोबार भएको छ ।

नेप्से १.३६ प्रतिशत अर्थात २३।३२ अंकले बढेर १ हजार ७४१.८१ मा पुगेको छ भने ५० करोडभन्दा धेरै पूँजी भएका कम्पनीहरुको सूचक मापक सेन्सेटिभ इन्डेक्स भने ०.८० अंकले घटेर ३३८.०९ बिन्दुमा बन्द भएको छ ।

आज कारोबारमा आएका १२ उपसमूहका परिसूचकमध्ये आज ९ वटा उपसमूहको इन्डेक्स बढेको छ भने जलविद्युत, विकास बैंक र बैंकिङ्ग सहित ३ वटा उपसमूहको परिसूचक मात्र घटेको छ ।

• आज ६ कम्पनीहरुको शेयर सकारात्मक सर्किट

बुधबारको बजारमा ६ कम्पनीहरुको शेयरमूल्यमा सकारात्मक सर्किट लागेको छ ।

गोर्खाज फाइनान्स, हिमालयन डिष्टिलरी लिमिटेड, बोटलर्स नेपाल (तराई), विशाल बजार कम्पनी, साल्ट ट्रेडिङ्ग कर्पोरेशन र शिवम् सिमेन्टको शेयर मूल्य करिब १० प्रतिशतले बढेर सकारात्मक सर्किट लागेको हो ।

शिखर इन्स्योरेन्स, ओरियन्टल होटल, नेपाल इन्स्योरेन्स कम्पनी, र नागरिक लगानी कोषको शेयरमूल्य पनि ७ प्रतिशतभन्दा धेरैले बढेको छ ।

• ६ कम्पनीको शेयरमूल्य ५ प्रतिशत बढी घट्यो

आजको बजारमा ६ कम्पनीको शेयरमूल्य ५ प्रतिशत बढी घटेको छ । घलेम्दी हाइड्रोपावर, युनाइटेड मोदी हाइड्रोपावर, दीब्यश्वरी हाइड्रोपावर, सबैको लघुवित्त, नेपाल हाइड्रो डेभलोपर कम्पनी र सिन्धु विकास बैंकको शेयरमूल्य ५ प्रतिशतभन्दा धेरैले घटेको हो ।

छ्याङ्दी हाइड्रोपावर, जोशी हाइड्रोपावर, अरुण काबेली पावर, र कर्पोरेट डेभलपमेन्ट बैंकको शेयरमा लगानी गरेका लगानीकर्ताले पनि आजको बजारबाट ४ प्रतिशतभन्दा धेरैले गुमाएका छन् ।

• नेपाल पुनर्बिमा कम्पनीको उच्च कारोबार

आज कारोबार रकमको आधारमा नेपाल पुनर्बिमा कम्पनीको सर्वाधिक रकमको कारोबार भएको छ । कम्पनीको ३३ करोड ६२ लाख ५९ हजार रुपैयाँभन्दा बढीको कारोबार भएको हो ।

दोस्रो ठूलो कारोबार भएको नेपाल टेलिकमको ३० करोड ८५ लाख र तेस्रो नेपाल लाइफको २५ करोड ९४ लाख ९१ हजार रुपैयाँको कारोबार भएको छ ।

शिवम् सिमेन्टस्, एनआईसी एशिया बैंक, प्रभु बैंक, शिखर इन्स्योरेन्स, नेको इन्स्योरेन्स, नागरिक लगानी कोष, र राष्ट्रिय बीमा कम्पनी शीर्ष कारोबार हुने दश कम्पनीभित्र समेटिएका छन् ।

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।