लगातार ४३५ अंकले बढेको बजारमा पहिलो पटक दोहोरो अंकको करेक्शन

पछिल्लो १५ कारोबार दिनमा लगातार बढेर ४३५ अंक माथि उक्लिएको शेयर बजारमा बिहीबार पहिलो पटक दोहोरो अंकको करेक्शन आएको छ । पछिल्लो १५ कारोबारमा बीचमा एकदिन २ अंकको झिनो करेक्शन देखापरे पनि बिहीबार भने दोहोरो अंकको करेक्सन आएको हो ।

गत कात्तिक २३ बाट लगातार बढेको बजार मंसिर ८ गते २ अंकले घटेको थियो। त्यसपछि निरन्तर बढेको बजारले हालसम्मकै सर्वाधिक उचाई हासिल गरेको थियो। निरन्तर बढेको बजारमा नाफा सुरक्षित गर्नेहरु बढेपछि बजारले करेक्शनको बाटो समातेको हो । विश्लेषकहरुले समेत करेक्शन नभई बढेको बजारमा बढी जोखिम हुने बताउने गरेका थिए ।

बुधबार मात्र नेप्से सूचक २०७१ अंकमा पुगेर हालसम्मकै सर्वाधिक उचाई हासिल गरेको थियो । त्यसको भोलिपल्ट खुलेको बजारमा १५ अंकको करेक्शन आएको हो । बिहीबार बजार खुलेको सुरुवाती चरणमा बढेको बजार २११८ अंकसम्म उक्लिएको थियो ।

प्रि-ओपनिङ सेसनमै झण्डै २० अंकले बढेको बजार नियमित कारोबार सेसनको पहिलो दश मिनेटमै २११८ अंकसम्म उक्लिएको थियो । त्यसपछि करेक्शन देखा परेको बजार बन्द हुने समयसम्म आईपुग्दा १५.५७ अंकले घटेर २०५५.४५ अंकमा झरेको छ । आजको बजारमा उच्चतम ६३ अंकको उतार-चढाब देखिएको छ ।

बिहीबार कारोबार भएका २०० कम्पनीको ६४ हजार ४ सय २६ बटा कारोबारवाट ८ अर्ब २ करोड रुपैयाँ बराबरको एक करोड ५८ लाख कित्ता शेयर खरिद बिक्री भएको छ । यो कारोबार रकम, शेयर संख्या तथा कारोबार संख्या अघिल्लो दिनको तुलनामा धेरै हो ।

पछिल्ला दिनहरुमा लगानीकर्ता एकै दिनमा बहु-समुह परिवर्तन गरेर शेयर खरिद बिक्री गरेको अवस्था छ । लगानीकर्ताले शेयर ठूला भन्दा पनि साना कम्पनी रहेको समुहको शेयर छिटो-छिटो सिफ्ट गरेको देखिन्छ । पोर्टफोलियो बदल्ने क्रममा नाफा सुरक्षित गर्दै लगानीकर्ता बाहिरिँदा बिक्री चाप आउन थालेको छ ।

बिहीबारको बजारमा जलविद्युत र माइक्रोफाइनान्स बाहेक बाँकी सबै समूहमा गिरावट आएको छ । यसदिन तीन कम्पनीको शेयरमूल्य ९ प्रतिशत बढीले उकालो लागेको छ । एभरेष्ट इन्स्योरेन्स संस्थापक, अपर हाइड्रो र नेपाल सेवा लघुवित्तको शेयरमूल्य उच्चदरले बढेको छ ।

यसदिन विशाल बजार कम्पनी, साल्ट्र ट्रेडिङ तथा बोटलर्स नेपाल तराई लगायतका कम्पनीको शेयरमूल्य उच्चदरले घटेको छ ।